Ормуздағы жағдай ушығып барады: Иран кемелерге жаңа талап қоймақ

Иран Парсы шығанағында кемелердің қозғалысына шектеу қойылатын жаңа аймақ құратынын мәлімдеді. Ел билігі рұқсатсыз кірген кемелерге қарсы шара қолданылатынын ескертті. Бұл туралы Reuters хабарлады.

Иран Ұлттық қауіпсіздік жоғары кеңесінің хатшысы Мохсен Резаи жаңа аймақтың нақты шекарасы мен тәртібі кейінірек жарияланатынын айтты. Бұл мәлімдеме АҚШ пен Иран арасындағы әскери текетірес қайта күшейген тұста жасалды.

Бұған дейін АҚШ күштері Иран маңындағы үш мұнай тасымалдаушы кемеге соққы берген. АҚШ Орталық қолбасшылығы мұның алдында Иран Ислам революциясы сақшылар корпусы АҚШ Әскери-теңіз күштерінің екі кемесіне баллистикалық зымыран ұшырғанын мәлімдеді. Иран тарапы да Ормуз бұғазында белгіленбеген бағытпен жүрген үш танкерді нысанаға алғанын хабарлаған.

Тегеран АҚШ жаңа шабуыл жасаса, Парсы шығанағындағы энергетикалық нысандарға жауап соққысы берілуі мүмкін екенін ескертті. Иран сондай-ақ АҚШ әскери кемелеріне қарсы жетілдірілген «Қасем Басир» зымыранын қолданғанын мәлімдеді.

Аймақтағы шиеленіс Ормуз бұғазы арқылы кеме қатынасына да әсер етіп отыр. Апта басында бұғаздан өткен жүк кемелерінің саны азайған. Ормуз әлемдік мұнай мен газ тасымалы үшін аса маңызды теңіз жолдарының бірі саналады.

Шиеленіс мұнай бағасын да көтерді. Brent маркалы мұнай дүйсенбіде барреліне 97,31 долларға дейін қымбаттап, шілденің соңынан бергі ең жоғары деңгейге жетті.