Оңтүстік Кореяның экс-президенті өлім жазасына кесілуі мүмкін

Оңтүстік Кореяның бұрынғы президенті Юн Сок Ёльдің айналасындағы дау ушыға түсті. Арнайы прокурор Сеулдің жоғарғы сотында экс-президентке қатысты үкімді қайта қарап, оны өлім жазасына кесуді талап етті, деп хабарлайды Yonhap.

Естеріңізде болса, 2024 жылдың желтоқсанындағы әскери жағдай енгізу әрекеті бойынша бірінші сатыдағы сот Юн Сок Ёльді өмір бойына бас бостандығынан айырған болатын. Алайда, айыптау тарапы бұл жазаны «тым жұмсақ» деп санайды. Прокурорлардың пайымдауынша, бұрынғы мемлекет басшысының әрекеті елдің конституциялық құрылысына қарсы жасалған ауыр қылмыс.

Апелляциялық сот процесі бұған дейін Юн Сок Ёльдің сот құрамына сенімсіздік білдіруіне байланысты бір айға тоқтатылған еді. Алайда Жоғарғы сот бұл өтінішті қанағаттандырмады.

Айыптау тарапы тек Юн Сок Ёльді ғана емес, оның айналасындағыларды да жазалауды сұрап отыр. Мәселен, бұрынғы қорғаныс министрі Ким Ён Хёнға бұрын кесілген 30 жылдық мерзімді өмір бойына бас бостандығынан айыру жазасына ауыстыруды талап етті.

Айта кетейік, экс-президентке қатысты істер мұнымен шектелмейді: бұған дейін ол ұшқышсыз басқарылатын аппараттарды іске қосу арқылы КХДР-мен қақтығыс тудыруға тырысқаны үшін 30 жылға сотталған болатын. Қазіргі таңда Юн Сок Ёльдің тағдыры «өлім жазасы ма, әлде өмірлік түрме ме?» деген сауалдың төңірегінде шешілмек.