Оңтүстік Кореяда орман өртіне байланысты төтенше жағдай жарияланды, қаза тапқандар бар

Оңтүстік Корея үкіметі орман өртінің өршуіне байланысты елдің оңтүстік-шығыс өңірлерінде төтенше жағдай режимін жариялады, деп хабарлайды Yonhap агенттігі.

Соңғы деректерге сәйкес, алапат өрт салдарынан кем дегенде төрт адам қаза тауып, жүздеген тұрғын үй-жайларын тастап кетуге мәжбүр болған.

Өрт сөндірушілер 21 наурызда елдің оңтүстігіндегі Санчхон округінде және тағы бірнеше өңірде басталған өртпен күресуде. Кореяның Орман шаруашылығы қызметінің мәліметінше, 22 наурыз кешіндегі жағдай бойынша Санчхондағы өрттің шамамен 25 пайызы ауыздықталған. Мұнда төрт адам қаза тауып, алты адам жараланған.

Жалынды ауыздықтауға жүздеген құтқарушы мен ондаған арнайы техника жұмылдырылды. Өрт салдарынан қазірге дейін шамамен 847 гектар орман жанып кеткен. Санчхон ауданынан 260-қа жуық адам эвакуацияланды.

Ульсан қаласы мен көрші Кёнсансан провинциясында да өрт басталып, тағы 620 тұрғын үйін тастап кетуге мәжбүр болды.

Оңтүстік Корея үкіметі елдің оңтүстік өңірлерінде төтенше жағдай жариялап, өрттен ең көп зардап шеккен Санчхон округін ерекше апат аймағы деп таныды.