Оңтүстік Кореяда кезектен тыс президент сайлауы қашан өтетіні белгілі болды

Оңтүстік Кореяда кезектен тыс президент сайлауы 3 маусым күні өтеді, деп хабарлады Yonhap агенттігі.

Үкіметтегі дереккөздің айтуынша, министрлер кабинетінің кезекті отырысында сайлау күні ресми түрде жарияланады.

Оңтүстік Корея Конституциясы мен мемлекеттік қызметкерлерді сайлау туралы заңына сәйкес, Конституциялық сот президентке импичмент жариялаған күннен бастап 60 күн ішінде сайлау өтуі тиіс. Сайлау күні кемінде 50 күн бұрын жариялануы керек.

Бұрынғы президент Юн Сок Ёльге 4 сәуірде Конституциялық сот шешімімен қызметтен босату туралы шешім шыққан. Осыған сәйкес, қазіргі уақытша президент әрі премьер-министр Хан Док Су сайлау күнін 24 мамыр мен 3 маусым аралығында белгілеуі тиіс.

Кәдімгі жағдайда, яғни президенттің өкілеттік мерзімі аяқталған кезде сайлау сәрсенбі күні өтеді. Алайда кезектен тыс сайлау кезінде нақты күнді белгілеуге қатысты арнайы ереже жоқ.

Егер сайлау күні 3 маусым болып бекітілсе:

• Кандидаттарды тіркеу күні — 11 мамыр;

• Сайлауалды үгіт-насихат кезеңі — 12 мамырдан 2 маусымға дейін;

• Мемлекеттік қызметкерлер үміткер болу үшін 4 мамырға дейін қызметтен кетуі тиіс;

• Жаңа сайланған президент нәтижелер расталғаннан кейін бірден қызметіне кіріседі.