Норвегия ханшайымының ұлы екі әйелді зорлағаны үшін 4 жылға бас бостандығынан айырылды

Осло қалалық соты Норвегия ханшайымы Метте-Мариттің ұлы Мариус Борг Хёйбиге қатысты сот шешімін жариялады. 29 жастағы айыпталушы зорлау және бірқатар ауыр қылмыстық эпизодтар бойынша кінәлі деп танылып, 4 жылға бас бостандығынан айырылды. Бұл туралы халықаралық БАҚ дереккөздеріне сілтеме жасай отырып хабарлаймыз.

Мариус Борг Хёйбиге жалпы саны 38 қылмыстық эпизод бойынша айып тағылған. Олардың қатарында зорлау, серіктестеріне қатысты зорлық-зомбылық көрсету, өліммен қорқыту, есірткі заттарын заңсыз сақтау және жол қозғалысы ережелерін бұзу сияқты ауыр баптар бар. Тергеу органдарының мәліметінше, аталған заңсыз әрекеттер 2018 жылдан 2024 жылдың қарашасына дейінгі уақыт аралығында орын алған.

Сот отырысы барысында Хёйби жол қозғалысы ережелерін бұзу мен есірткіге қатысты қылмысты толық мойындады. Сонымен қатар ол адамдарды қорқыту және дене жарақатын келтіру бойынша айыптарды «ішінара» мойындағанымен, зорлау фактілерін түбегейлі теріске шығарған еді. Алайда сот прокуратура ұсынған дәлелдемелер мен жәбірленушілердің куәліктерін негізге ала отырып, қатаң үкім шығару туралы шешім қабылдады.

Мариус Борг Хёйби – кронпринцесса Метте-Мариттің алғашқы некесінен туған ұлы. Оның корольдік титулы жоқ және ресми мемлекеттік міндеттерді атқармайды. Соған қарамастан, корольдік отбасы мүшесіне қатысты мұндай ауыр қылмыстық іс Норвегия қоғамында үлкен резонанс тудырды. Құзырлы органдар істің толық мән-жайын анықтау мақсатында зерттеу жұмыстарын жалғастыруда.