Ноланның «Одиссеясы»: Италияның шағын аралы жаһандық туристік орталыққа айналмақ

Кристофер Ноланның экранға шыққан «Одиссея» (The Odyssey) блокбастері Сицилия жағалауында орналасқан Фавиньяна аралына туристер тартуға жаңа серпін беруде. Алайда жергілікті билік шектен тыс туризм салдарынан туындайтын проблемалардың алдын алуды басты назарда ұстап отыр, деп хабарлайды Reuters.

Гомердің эпосына негізделген бұл туынды алғашқы демалыс күндері әлемдік прокатта 264 миллион доллардан астам қаржы жинап, режиссердің шығармашылық жолындағы ең табысты премьераға айналды. Фильмде Гомердің туған жері - Итака аралы ретінде Фавиньяна таңдалған. Ал кейіпкердің сарайы ретінде Санта-Катерина тарихи қамалы пайдаланылды.

3 мыңға жуық тұрғыны бар арал әкімшілігі Голливуд картинасының танымалдығын ұзақ мерзімді туристік артықшылыққа айналдыруды көздейді. Сицилияның мәдениет департаменті мен Universal Pictures студиясының қолдауымен қазан айында мұнда арнайы көрме ашылады деп жоспарлануда. Экспозиция түсірілім барысында пайдаланылған костюмдерді, техниканы және өндірістік кезеңдерді көрермен назарына ұсынады.

Кинематография саласының туризмге тигізетін әсері жыл сайын артып келеді. БҰҰ Дүниежүзілік туристік ұйымының (UNWTO) мәліметінше, танымал фильмдер түсірілген аймақтарда саяхатшылар ағыны 25%-дан 40%-ға дейін өседі. Түсірілім тобы 2024 жылдың соңы мен 2025 жылдың көктемі аралығында аралда жұмыс істеп, жергілікті экономикаға 1-2 миллион еуро көлемінде инвестиция әкелген.

Өңірдегі туристік өсімді тиімді басқару мақсатында 2027 жылғы маусымға қарай инфрақұрылымды жаңарту қолға алынбақ. Соның ішінде, бұрынғы Valtur демалыс ауылының орнына бес жұлдызды курорт және Palazzotto Florio тарихи ғимаратында премиум-кластағы қонақүй кешенін ашу жоспарланған.