Непал мен Қытайдағы тасқыннан қаза тапқандар саны 800-ге жуықтады

Непал мен Қытай шекарасындағы жойқын тасқыннан қаза тапқандар саны 800-ге жуықтады. Екі елде 3 мыңнан астам адам із-түзсіз жоғалғандар қатарында, деп хабарлады Reuters.

Непалдың табиғи апаттармен күрес басқармасының мәліметінше, елде 781 адам қаза тауып, 2 502 адам жоғалған. Қытай тарапы Гиронг ауданында 16 адамның қаза тапқанын, тағы 546 адамның іздестіріліп жатқанын хабарлады. Тибеттегі Непалмен шекара маңында 23 елдің 261 азаматының да қайда екені белгісіз.

Қызыл Крест бағалауынша, табиғи апаттан 90 мыңнан астам адам зардап шеккен.

Құтқару жұмыстары қолайсыз ауа райына байланысты бірнеше рет тоқтатылған. Непал мен Қытай шекарасында апаттан кейін пайда болған көл арнасынан асып, жаңа тасқын қаупін күшейткен. Кейін көлдің суы едәуір тартылғанымен, төменгі ағыста жаңа көшкін жүріп, тағы бір бөгет пен су қоймасы пайда болған.

Непалдағы Жоғарғы Тришули су электр нысанында шамамен 350 адамның туннель ішінде қалып қоюы мүмкін деген ақпарат та түскен. Жексенбіде әскер ауыр техниканы тікұшақпен жеткізіп, құтқарушылар туннельдердің бірінің кіреберісіне жетіп, үйінділерді тазалауға кірісті.

Непал Сыртқы істер министрлігінің өкілі Лок Бахадур Чхетри елге туннельдердегі құтқару жұмыстары, ДНҚ сараптамасы, мәйіттерді сақтау және адам сүйектерін сот-медициналық жолмен анықтау бағыттарында халықаралық көмек қажет екенін айтты.

Қазір жүздеген адамның жеке басы анықталмай жатыр. Сенбіде аты-жөні белгісіз 96 адам жерленген, жексенбіде тағы 100-ден астам адамды жерлеу жоспарланған. Кейін туыстары анықтай алуы үшін ДНҚ үлгілері алынып, жерленген орындар құжатталған.

Қытайдың CCTV арнасы ғалымдарға сілтеме жасап, тасқын мұздықтардың тұрақсыздануымен байланысты болуы мүмкін екенін хабарлады. Мамандар мұны жаһандық жылынудың ұзақмерзімді салдарымен байланыстырып отыр.