Қытай көліктеріне бәсеке: Еуроодақ Жапония және Оңтүстік Кореямен күш біріктірмек

Еуропалық комиссия Қытай автомобиль өндірушілерінің Еуропа нарығындағы үлесі артуына байланысты Ұлыбритания, Жапония және Оңтүстік Кореямен автомобиль саласында одақ құру мүмкіндігін қарастырып жатыр. Бұл туралы дереккөздеріне сүйенген немістің Handelsblatt газеті хабарлады.

Басылым мәліметінше, мұндай одаққа кірген елдер бір-бірінің автомобильдеріне өз нарығында жеңілдіктер беруі мүмкін. Еурокомиссия осылайша қытайлық автомобиль өндірушілерінің Еуропадағы қарқынды өсіміне бәсеке қалыптастыруды көздейді.

2026 жылдың бірінші тоқсанында Еуроодаққа сырттан әкелінген гибрид автомобильдердің 60 пайызы Қытайдың үлесіне тиген. Handelsblatt Еуропаның жаңа әріптестік тетігін қарастыруына осы көрсеткіштің өсуі себеп болғанын жазады.

Еуропалық автомобиль өндірушілері қауымдастығының дерегінше, 2025 жылдың алғашқы жеті айында Еуроодақта жаңа автомобильдерді тіркеу бір жыл бұрынғы осы кезеңмен салыстырғанда 0,7 пайыз азайған.