Қырғызстанда балаға әкесі мен анасының тегін қатар беру мәселесі қарастырылуда

Қырғыз Республикасының Парламент депутаттары «Азаматтық хал актілері туралы» заңнамаға өзгерістер енгізу арқылы балаларға ата-анасының екі тегін қатар алуға рұқсат беруді ұсынып отыр.

Қазіргі қолданыстағы заң талаптарына сәйкес, балаға ата-анасының келісімі бойынша тек біреуінің ғана фамилиясын беруге рұқсат етілген. Депутаттар ұсынып отырған түзетулер қабылданған жағдайда, ата-аналар сәбиге өздерінің тегін дефис арқылы қосарлап беру құқығына ие болады.

Жаңашылдықтың ерекшеліктері:

Әкесі немесе анасының тегінің қайсысы бірінші жазылатынын ата-ана өз қалауы бойынша айқындай алады.

Аталған заң жобасы бойынша тек екі фамилияны ғана қосарлауға рұқсат беріледі, ал үш фамилияны біріктіруге тыйым салынады.

Заң шығарушылардың айтуынша, мұндай бастаманы көтеруге азаматтардан түскен өтініштер түрткі болған. Оған мысал ретінде, бұған дейін отбасылардың бірі баласына қос тек беруге талпынғанымен, қолданыстағы нормаларға байланысты тіркеу органдарынан рұқсат ала алмағаны алға тартылды.

Бұл бастама азаматтардың сұранысын қанағаттандыруға және құжат рәсімдеу кезіндегі кедергілерді жоюға бағытталған.