Қырғызстан мен Қытай шекарада көпір салып, мәңгілік достық туралы шартқа қол қойды

31 тамыз күні Қырғыз Республикасы Президентінің Бішкектегі «Ынтымак Ордо» жаңа резиденциясында Қырғызстан Президенті Садыр Жапаров пен Қытай Халық Республикасының Төрағасы Си Цзиньпиннің ресми кездесуі өтті. Екіжақты келіссөздер барысында тараптар жоғары деңгейдегі саяси сенімді, сауда-экономикалық және инвестициялық ынтымақтастықты кеңейтуді, сондай-ақ ірі инфрақұрылымдық жобаларды жүзеге асыру мәселелерін талқылады.

Кездесу аясында екі мемлекеттің даму стратегияларын үйлестіру, «Бір белдеу - бір жол» бастамасы, мемлекеттік басқару саласында тәжірибе алмасу және Шанхай ынтымақтастық ұйымы (ШҰҰ) шеңберіндегі өзара іс-қимылды тереңдету бағыттары қарастырылды.

Қырғызстан Президенті Садыр Жапаров екі ел арасындағы қарым-қатынастың жаңа деңгейге көтерілгенін атап өтті:

«Қысқа тарихи кезеңде біздің қарым-қатынасымыз жаңа дәуірдегі жан-жақты стратегиялық серіктестік деңгейіне шықты және бүгінгі күні бұрын-соңды болмаған тарихи жоғары деңгейде тұр. Елдеріміз арасындағы ынтымақтастық өз дамуының жаңа «алтын дәуіріне» қадам басты деп сенімді түрде айта аламын».

Өз кезегінде ҚХР Төрағасы Си Цзиньпин қырғыз-қытай қатынастарының қазіргі жай-үйіне жоғары баға беріп, саяси өзара сенімнің жоғары деңгейін және практикалық ынтымақтастықтың қарқынды дамуын тілге тиек етті. Оның айтуынша, екі елдің өзара іс-қимылы бүкіл өңірдегі бейбітшілікті, тұрақтылықты және тұрақты дамуды қамтамасыз етуге елеулі үлес қосуда.

Келіссөздер қорытындысы бойынша тараптар:

• Мәңгілік тату көршілік, достық пен ынтымақтастық туралы шартқа;

• Қырғыз Республикасы мен Қытай Халық Республикасының жаңа дәуірдегі жан-жақты стратегиялық серіктестікті сапалы дамыту жөніндегі бірлескен декларациясына;

• Бірқатар маңызды халықаралық және салааралық құжаттарға қол қойды.

Сондай-ақ қырғыз-қытай шекарасындағы «Бедель» өткізу пункті ауданында шекаралық аумақты кесіп өтетін Үзөңгү-Кууш өзені арқылы өтетін автокөлік көпірін салу туралы келісім бекітілді.

Президент әкімшілігінің хабарлауынша, тараптар «Бедель» өткізу пунктін дамытуға және ұзындығы 150 шақырымды құрайтын Барскоон - Бедель автокөлік жолының құрылысына ерекше назар аударған.

Бұл стратегиялық жобаларды іске асыру Қырғызстанның транзиттік әлеуетін едәуір нығайтып, көліктік байланысты кеңейтеді және Қытай мен Орталық Азия арасында жаңа халықаралық көлік-логистикалық дәлізін құрады.

Анықтама ретінде: Барскоон - Бедель автожолының құрылысы өткен жылдың 26 тамызында бастау алған болатын. Жобаны іске асыру мерзімі - 5 жыл. Жоспарға сәйкес, автожол 2030 жылы толық пайдалануға беріледі.