Қазақстандықтарды соғысқа қатысуға шақырған парақшалардың таралуына қатысты тексеріс жүргізіліп жатыр

Құқық қорғау органдары не дейді?

Tengrinews.kz редакциясы ресми сауал жолдағаннан кейін, Ұлттық қауіпсіздік комитеті (ҰҚК) интернетте аталған парақшалардың жариялануына байланысты тексеру жүргізіліп жатқанын мәлімдеді.

"Дегенмен парақшалардың қалалар мен өңірлерде физикалық түрде таратылғаны туралы ақпарат расталмады", — деді ҰҚК өкілдері.

Яғни, парақшалар тек интернетте тараған.

Ішкі істер министрлігі де парақшалардың тікелей таратылған фактілері анықталмағанын хабарлады.

"Сонымен қатар әлеуметтік желілерде басқа елдердің қарулы күштерімен келісімшарт жасасуға шақыратын материалдар жарияланғаны белгілі болды", — деп толықтырды министрлік.

Аталған фактілер бойынша құқық қорғау және арнайы органдар тексеру жүргізіп жатыр.

Соғысқа қатысқандар қалай жазаланады?

ІІМ азаматтарды Қазақстан заңнамасын қатаң сақтауға және шетелдегі әскери әрекеттерге қатыспауға шақырады.

Қазақстан заңына сәйкес, басқа елдің қарулы қақтығысына немесе әскери әрекетіне заңсыз қатысқан азаматтар (егер жалдамалылық белгілері болмаса) 5 жылдан 9 жылға дейін бас бостандығынан айырылуы мүмкін (Қылмыстық кодекстің 172-бабы).

Ал жалдамалы ретінде соғысқан жағдайда (ҚК 170-бабы), 7 жылдан өмір бойына дейін бас бостандығынан айыру жазасы қарастырылған. Сонымен қатар азаматтықтан айыру және мүлікті тәркілеу шаралары да қолданылуы мүмкін.

ІІМ мәліметінше, 2022 жылдан бері шетелдегі соғысқа қатысқаны үшін Қазақстанда 97 қылмыстық іс қозғалған: оның 5-еуі 170-баппен, 92-сі 172-баппен тіркелген.