Қазақстандықтар Қытайдың 11 қаласына аптасына 152 рейс арқылы қатынай алады

Қазақстан мен Қытай арасындағы әуе қатынасы тың серпін алды. Пекинде өткен келіссөздер нәтижесінде тараптар екі ел арасындағы тұрақты жолаушылар рейстерінің санын аптасына 152-ге дейін жеткізуге келісті. Бұл өзгеріс қос мемлекеттің авиациялық байланысын жаңа деңгейге көтереді.

Жаңартылған келісім аясында Қазақстанмен әуе байланысын орнататын қытайлық ірі қалалардың тізімі 11-ге дейін кеңейтілді. Олардың ішінде Чунцин сынды ірі өнеркәсіптік әрі логистикалық орталықтар бар. Сонымен қатар тараптар Астана мен Шанхай арасында тікелей рейстер ашу мүмкіндігін талқылап, үшінші халықаралық әуе дәлізін іске қосуды жоспарлап отыр. Мұндай қадамдар әуе кеңістігінің өткізу қабілетін арттырып, ұшу бағыттарын оңтайландыруға және жолаушылар үшін қолайлы жағдай жасауға жол ашады.

Кездесуде авиациялық іздестіру және құтқару қызметтерін дамыту, сондай-ақ қазақстандық тасымалдаушыларға Қытай әуежайларынан қосымша слоттар бөлу мәселелері де назардан тыс қалмады. Бұл стратегиялық әріптестіктің нығаюына септігін тигізеді.