Израиль Газа секторында әскери операцияны күшейту үшін ондаған мың резервисті шақыртты

Израиль Қарулы күштері (ЦАХАЛ) ХАМАС тобына қарсы Газа секторындағы әскери операцияны кеңейту және барынша күшейту үшін ондаған мың резервисті шақырып жатқанын хабарлады.

Әскерилердің айтуынша, бұл қадам тұтқындарды босатуға бағытталған қысымды арттыру және ХАМАС-тың жер үстіндегі және жерасты инфрақұрылымын жою мақсатын көздейді. Қазіргі уақытта Газа секторында ХАМАС тұтқынында 59 адам қалып отыр. Болжам бойынша, оның 24-і ғана тірі.

18 наурызда екі айға созылған уақытша бітім аяқталғаннан кейін, Израиль әскері операцияны қайта жалғастырып, Газа секторындағы едәуір аумақты бақылауға алған. Мыңдаған бейбіт тұрғын қайтадан аймақтан кетуге мәжбүр болды.

Гуманитарлық ұйымдар азық-түлік, су және дәрі-дәрмектің жетіспеушілігіне байланысты жағдайдың ушығып бара жатқанын айтып, Израильдің әрекетін "ашаршылық саясаты" деп атап, оны әскери қылмысқа теңеді. Алайда Израиль бұл айыптауларды жоққа шығарып отыр.

Қақтығыс 2023 жылғы 7 қазанда басталды. Сол күні ХАМАС Израильге зымыранмен шабуыл жасап, ел аумағына басып кіріп, шамамен 1200 адамды өлтірді. Сондай-ақ 250-ден астам адам тұтқынға алынып, Газаға әкетілді. Израиль жауап ретінде ХАМАС-қа соғыс жариялады. ХАМАС бақылауындағы Газа денсаулық сақтау министрлігінің мәліметінше, әскери іс-қимылдар салдарынан 48 мыңнан астам палестиналық қаза тауып, 111 мыңнан астам адам жараланған.