Испания тарихындағы ең ыстық жаз: аномалды аптап 61 күнге созылып, мыңдаған адамның өмірін қиды

Мемлекеттік метеорологиялық агенттіктің (AEMET) ресми мәліметіне сәйкес, 2026 жылдың жазы Испаниядағы бақылау тарихындағы ең ыстық мезгіл ретінде тіркелді. Пиреней түбегі мен Балеар аралдарында төтенше аптап ыстық 61 күнге созылып, 2022 жылғы 41 күндік рекордтық көрсеткіштен айтарлықтай асып түсті.

Метеорологиялық бақылау кезеңінде орташа ауа температурасы 24,5°C құрады, бұл өткен жылғы рекордтық көрсеткіштен 0,3°C-қа жоғары. Жаз мезгілінің шамамен екі күнінің бірінде қалыптан тыс жоғары температуралық режим сақталған. Төтенше ауа райы ресми жаз мезгілінің шегінен шығып, мамыр айының соңында-ақ шілдеге тән температура тіркелсе, метеорологиялық күздің басында, яғни 2-7 қыркүйек аралығында аптаптың кезекті толқыны байқалды.

Күннің күрт ысуы халықтың денсаулығы мен өмір сүру қауіпсіздігіне айтарлықтай қатер төндірді. Өлім-жітімді күнделікті мониторингтеу жүйесінің 31 тамыздағы мәліметі бойынша, жоғары температураның салдарынан 5 232 өлім жағдайы тіркелді. Бұл - 2015 жылы статистика жүргізіле бастағаннан бергі ең жоғары көрсеткіш. Сала мамандарының хабарлауынша, аномалды аптаптың кері салдары, әсіресе, егде жастағы азаматтардың денсаулығына ауыр тиген.