Иранның Жоғарғы көшбасшысы Әли Хаменеи қаза тапқаннан кейін елде билік үшін күрес күшейді

Иранның жоғарғы көшбасшысы Әли Хаменеидің қазасынан кейін ел басшылығындағы саяси күштер арасындағы қайшылық күшейді. Бұл жөнінде ирандық жоғары лауазымды шенеуніктер мен Ислам революциясы сақшылар корпусының (ИРСК) өкілдеріне сілтеме жасап The New York Times басылымы хабарлады.

Дереккөздердің мәліметінше, қазіргі уақытта Ирандағы түрлі саяси топтар жаңа Жоғарғы көшбасшы Мұжтаба Хаменеиге ықпал ету үшін өзара тартысқа түскен. Бұған дейін негізгі бәсеке реформашылар мен консерваторлар арасында болып келсе, қазіргі уақытта консерваторлар лагерінің өз ішінде жікке бөліну үдерісі байқалып отыр.

The New York Times басылымының жазуынша, қазіргі кезде ел билігінде басымдыққа ИРСК-тің жоғары қолбасшылары, парламент спикері Мохаммад Багер Ғалибаф, президент Масуд Пезешкиан және Ұлттық қауіпсіздік жоғары кеңесінің хатшысы Мохаммад Багер Зұлқадір кіретін прагматикалық топ ие болып отыр. Дәл осы топ атысты тоқтатуға және АҚШ-пен келіссөздердің басталуына ықпал еткен, ал қатаң бағыт ұстанатын топтар Вашингтонға қандай да бір жеңілдік жасауға үзілді-кесілді қарсылық білдіруде.

Сонымен қатар басылым жаңа көшбасшы Мұжтаба Хаменеидің марқұм әкесін жерлеу рәсіміне қатыспағанын жазды. Инсайдерлер мұны Израиль тарапынан шабуыл жасалу қаупінің жоғарылығымен байланыстырады. Мұжтаба Хаменеидің жараланғаннан кейін көпшілік алдына шықпауы ел ішіндегі жаңа басшылыққа қатысты дүдәмал көңіл-күйді арттыра түскен.

Өз кезегінде The Washington Post газеті Әли Хаменеидің қазасы Иран билігін әлсіретпегенін, керісінше күштік құрылымдардың, әсіресе ИРСК-тің ықпалын арттырғанын жазды. Басылымның талдауына сәйкес, азаматтық саясаткерлер, оның ішінде президент Масуд Пезешкиан мен сыртқы істер министрі Аббас Арақчи стратегиялық шешім қабылдау үдерісінде екінші қатарға ығысып қалған.