Илон Маск 2025 жылдың соңына дейін Оптимус роботтарынан әскер жасақтамақ

Tesla корпорациясының бас директоры Илон Маск 2025 жылдың соңына дейін бес мың Optimus роботын жасап шығаруды жоспарлап отырғанын мәлімдеді. Бұл туралы ол X әлеуметтік желісіндегі тікелей эфирінде хабарлады.

Tesla-ның тоқсандық есебін таныстыру барысында Маск алға қойған 10 мың роботтың кем дегенде жартысын шығарудың өзі үлкен жетістік болатынын атап өтті. Ол бес мың роботты ежелгі римдік легионмен салыстырып, бір легион құрамында әртүрлі кезеңдерде екі мыңнан он мыңға дейін жауынгер болғанын еске салды.

«Менің ойымша, біз биыл кем дегенде бір легион робот құрастырамыз, ал келесі жылы бұл сан он легионға жетуі мүмкін», — деді Маск.

Ол робот өндірісі Tesla үшін мүлдем жаңа бағыт екенін, сондықтан бастапқы кезеңде қателіктер болуы мүмкін екенін атап өтті. Дегенмен ол роботтарды компанияның болашағы үшін ең маңызды әрі келешегі зор актив деп бағалады.

Бұған дейін Маск Tesla өндірген Optimus роботы 2026 жылдың соңында Марсқа жіберілетінін айтқан болатын. Оның айтуынша, бұл миссия сәтті өтсе, адамдарды Марсқа қондыру 2029-2031 жылдары басталуы мүмкін.