"Голливуд жойылып барады": Трамп шетелдік фильмдерге 100% тариф енгізбек

АҚШ президенті Дональд Трамп ел аумағынан тыс түсірілген барлық фильмге 100 пайыздық кедендік тариф енгізетінін мәлімдеді. Бұл туралы Reuters агенттігі хабарлады.

Президенттің айтуынша, Голливуд "өте жылдам өліп барады", ал өзге елдер салықтық жеңілдіктер арқылы ірі жобаларды өздеріне тартып отыр. Трамп мұны ұлттық қауіпсіздікке төнген қатер деп бағалады. Оның пікірінше, шетелдік фильмдер көрермен санасын "жат нарративке" бейімдейді және патриоттық құндылықтарды әлсіретеді.

«Бұл – ұйымдастырылған шабуыл. Бұл – месседждер мен насихат мәселесі», – деп жазды ол Truth Social желісінде.

Трамп Сауда министрлігіне және басқа да ведомстволарға тарифті енгізуге қатысты дайындықты дереу бастауға тапсырма берді. Министр Говард Латник бұл жұмыс қолға алынғанын растады.

Бұл шараның онлайн-платформалардағы фильмдерге де қолданылатыны не тек кинотеатрларда көрсетілетіндерге ғана қатысты екені әзірге белгісіз. Сондай-ақ тарифтің қалай есептелетіні: фильм бюджетіне, табыс көлеміне немесе басқа көрсеткішке негізделетіні де нақтыланбаған.

FilmLA дерегінше, соңғы 10 жылда Лос-Анджелестегі киноөндіріс 40%-ға қысқарған. Көптеген ірі жоба Канада, Еуропа, Аустралия сияқты салықтық жағынан тиімді елдерге көшіп жатыр. 2023 жылы 40 миллион доллардан асатын бюджетті фильмдердің жартысы АҚШ-та емес, шетелде түсірілген.

Бұған дейін Трамп Мел Гибсон, Джон Войт және Сильвестр Сталлонені "Голливудтағы арнайы өкілі" деп жариялаған еді. Бұл – ресми лауазым емес, тек АҚШ киноөндірісін жандандыруға бағытталған символикалық миссия.

«Фильмдер қайтадан Америкада түсірілгенін қалаймыз!» – деді Трамп.