Газа секторында жүздеген палестиналық ХАМАС-қа қарсы наразылыққа шықты

25 наурызда Газа секторының солтүстік бөлігінде жүздеген палестиналық Израильмен соғысты тоқтатуды талап етіп, наразылық акциясын өткізді. Демонстрацияға қатысушылар, негізінен ер адамдар, аймақты басқарып отырған радикалды исламшыл ХАМАС қозғалысына қарсы ұрандар айтты. Бұл туралы AFP агенттігі хабарлады.

Акцияға қатысқан палестиналықтардың бірі наразылықты кім ұйымдастырғанын білмейтінін айтқан.

«Мен халықтың атынан бір ғана нәрсені айту үшін келдім: соғысты тоқтатыңдар», – деді ол.

Қауіпсіздік мақсатында фамилиясын жасырған Мохаммед есімді тағы бір адам шеруді таратуға тырысқан ХАМАС қауіпсіздік қызметкерлерін көргенін жеткізді.

«Халық шаршады. Егер мәселенің шешімі ХАМАС-тың биліктен кетуі болса, олар халықты қорғау үшін неге биліктен кетпейді?» – деді демонстрацияның тағы бір қатысушысы AFP-ге берген сұхбатында.

Еске салсақ, 18 наурызға қараған түні Израиль әскері Газа секторындағы ХАМАС нысандарына әуе шабуылдарын қайта бастаған. Бұған дейін аймақта 19 қаңтарда жарияланған атысты тоқтату туралы келісім күшінде болатын. 19 наурыз күні Израиль жердегі әскери операцияны да қайта жалғастырды. Израиль үкіметінің мәлімдеуінше, әскери әрекеттің мақсаты – тұтқында отырған адамдарды босату үшін ХАМАС-қа қысымды күшейту.