«Еуропаға енді бармаспын»: ЕО-ға келушілерді есепке алудың жаңа жүйесі хаос тудыруда

Еуропалық Одаққа кіру-шығуды бақылаудың жаңа жүйесі (EES) техникалық ақауларға байланысты әуежайлардағы кептелістер мен жолаушылардың рейстерден қалып қалуына түрткі болуда. Әуежай әкімшіліктері мен авиатасымалдаушылар жүйенің толыққанды іске қосылуына дайын еместігін мәлімдеді.

Сәуір айынан бастап қолданысқа енгізілген EES жүйесі ЕО-ға мүше емес елдердің азаматтарынан биометриялық деректерді (саусақ ізі мен фото) тіркеуді талап етеді. Алайда тәжірибе жүзінде бұл инновация шекаралық бақылауда ұзақ кезектің қалыптасуына әкелді.

Техникалық ақаулар және кезектің ұзақтығы

Берлин әуежайының басшысы Алетта фон Массенбахтың айтуынша, жолаушылар паспорттық бақылаудан өту үшін екі сағатқа дейін кезекте тұруға мәжбүр. Оның пікірінше, әрбір мүше мемлекеттің әртүрлі ішкі жүйелерді қолдануы процессқа кедергі келтіріп, шекарадағы жағдайды шиеленістіруде.

Ал Британияның Дувр портында Францияға бағытталған арнайы деректерді өңдеу аймағында 84 киоск болғанымен, жабдықтардың істен шығуына байланысты олар әлі күнге дейін пайдаланылмай тұр. «ACI Europe» әуежайлар қауымдастығы Еуропалық комиссия президенті Урсула фон дер Ляйенге хат жолдап, ең жоғары маусымда кезек уақыты 5 сағатқа дейін жетуі мүмкін екенін ескертті.

Жаңа жүйенің сәтсіздігіне тап болған туристер сапарларынан бас тартуда. Мысалы, Рим әуежайында EES аппаратының істен шығуынан рейсінен қалып қойған британдық жолаушы Энн Робинсон қосымша шығынға ұшырап, келесіде Еуропаға саяхаттаудан бас тартатынын айтты.

Өз кезегінде Еурокомиссия өкілдері жүйенің жолаушыларға тигізетін жағымсыз әсерін азайту үшін барлық шара қолданылып жатқанын жеткізді. Дегенмен «Jet2» әуекомпаниясының бас директоры Стив Хипи жүйе дайын болмаған тұстарда шекаралық тексеруді уақытша тоқтата тұруды ұсынды.

Мамандар бұл жағдай жазғы демалыс маусымы кезінде еуропалық әуежайлардағы ахуалды одан сайын ушықтырып жіберуі мүмкін деп қауіптенеді.