Еуропа «өртеніп» жатыр: 1300-ден астам адам аномалиялық ыстықтың құрбаны болды

Еуропа аумағында 20 маусымнан бастау алған экстремалды ыстық толқыны аймақтардағы әлеуметтік және инфрақұрылымдық жүйелерге айтарлықтай салмақ түсірді. Дүниежүзілік денсаулық сақтау ұйымының (ДДСҰ) мәліметінше, қазіргі уақытта 150 миллионға жуық тұрғын қауіпті температура жағдайында өмір сүруге мәжбүр, деп хабарлайды Reuters.

Францияның қоғамдық денсаулық сақтау агенттігі аномалиялық ыстыққа байланысты 1000-ға жуық адамның қайтыс болғанын ресми түрде хабарлады. Зардап шеккендердің басым бөлігі - жалғыз тұратын егде жастағы азаматтар. Сонымен қатар қолайсыз ауа райынан туындаған дауылдар елдің солтүстік және орталық бөліктерінде электр желілерінің істен шығуына әкеліп, 36 мыңнан астам үй шаруашылығын қуат көзінсіз қалдырды.

Германия, Австрия, Чехия және Польшада температура рекордтық көрсеткіштерге жетіп, теміржол қатынасына шектеулер енгізілді. Венгрияда Дунай өзені суының қызуына байланысты «Пакш» атом электр станциясы суыту жүйесіндегі қиындықтар салдарынан қуат өндіру көрсеткішін төмендетуге мәжбүр болды. Италияда По өзенінің деңгейі төмендеп, теңіз суының құрлыққа енуі ауыл шаруашылығы мен экожүйеге қауіп төндіруде.

 ДДСҰ және ғалымдардың пікірі: ДДСҰ Бас директоры Тедрос Адханом Гебрейесус Еуропаның үйлері, жұмыс орындары мен мектептері мұндай экстремалды температураға мүлдем дайын емес екенін ескертті. Ғалымдардың айтуынша, бұл «он жылда бір болады» делінетін аномалия адамзат әрекетінен туындаған климаттың өзгеруінсіз мүмкін болмас еді, ал енді ол жыл сайын қайталануы мүмкін.

Францияның Денсаулық сақтау министрі Стефани Рист ауа райының біршама салқындағанына қарамастан, ыстықтың кері әсері алдағы он күн бойы сезілуі мүмкін екенін ескертіп, тұрғындарды сақтық шараларын сақтауға шақырды.