Еуропа музейлерін тонау толқыны: Луврдан кейін енді Сицилия шабуылға ұшырады

Италияның Сицилия аралында орналасқан Мессина өңірлік музейінде ақылға сыймайтын қылмыс орын алды. Өнер сүйер қауымды есеңгіретіп кеткен тонау сенбі күні кешке орын алып, XV ғасырда өмір сүрген әйгілі суретші Антонелло да Мессинаның қылқаламынан шыққан төрт бірдей картина қолды болды. Италияның Мәдениет министрі Алессандро Джули бұл ақпаратты ресми түрде растап, ұрланған жәдігерлердің тарихи әрі көркемдік құндылығы шексіз екенін мәлімдеді.

Ұрылар Сан-Грегорио полиптихінің үш бөлігін және ағаш тақтаның екі жағына қатар салынған «Мадонна мен сәби» және «Пиетадағы Иса» туындыларын қолды еткен. Музей директоры Мариса Меркурионың айтуынша, тонау кешкі сағат 21:50 шамасында болған. Ең сорақысы – қылмыскерлер музейге басып кіргенде ешқандай дабыл қаққыш жүйесі іске қосылмаған. Полиция қазіргі уақытта тонаушылардың ғимаратқа қалай оңай кіріп-шыққанын анықтауда. Terгеудің басты болжамы – бұл туындылар «қара нарыққа» сату үшін арнайы тапсырыспен ұрланған.

Ұрылар үшін бұл оңай олжа болмаған. Себебі картиналар кенепке емес, ауыр ағаш тақталарға салынғандықтан, оларды шиыршықтап орап алып кету мүмкін емес еді. Ұрланған туындылардың ішінде 1473 жылы шіркеу тапсырысымен жазылған әйгілі Сан-Грегорио полиптихі мен жеке дұға етуге арналып жасалған шағын қос бетті сурет бар.

Мессина мэрі Федерико Базиле бұл оқиғаны шаһар тарихына жасалған қастандық деп бағалап, қылмыскерлерді жазасыз қалдырмауға уәде берді.

Айта кету керек, кейінгі кезде Еуропа музейлерін тонау жиілеп кетті. Екі күн бұрын ғана Парма түбіндегі музейден Сезанн, Ренуар мен Матисстің 9 миллион еуролық суреттері қолды болса, өткен жылы Париждің Лувр музейінен Наполеон мен Франция ханшайымдарының 100 миллион долларлық әшекейлері тоналған еді. Еуропа музейлерінің қауіпсіздік жүйесіне қатысты сұрақ бұрынғыдан да ушығып тұр.