Дональд Трамп: Иранмен келісім жасалмаса, соққылардың қуаты арта түседі

АҚШ Президенті Дональд Трамп Иранды Вашингтонмен келіссөздерді кешіктіргені үшін айыптап, Тегеран «ауыр жаза» алатынын ескертті. Мемлекет басшысы жақын арада Иранға қарсы қатаң әскери шаралар қолданылуы мүмкін екенін жариялады, деп хабарлады Reuters.

Бұл мәлімдеме Ормуз бұғазындағы екіжақты қақтығыстардан кейін орын алды. Өз кезегінде, Иран Парламентінің Ұлттық қауіпсіздік комитетінің төрағасы Ибрахим Азизи, мүмкін болатын қақтығыс тек аймақтық сипатта емес, ауқымды боларын ескертті. Тегеран Вашингтонды атысты тоқтату режимін бұзды деп айыптап, дипломатиялық қатынастарды қайта қарау мәселесін көтерді.

Аталған жағдай әлемдік мұнай нарығына тікелей әсер етті. Мұнай бағасы 3 долларға қымбаттап, баррелі 94 долларға жақындады. Трамп АҚШ-тың құпия әскери операциялары арқылы танкерлердің қауіпсіздігі қамтамасыз етілгенін, әйтпесе бағаның бұдан да жоғары болар еді деп мәлімдеді.

Сонымен қатар АҚШ-тағы инфляция көрсеткіші соңғы үш жылдағы рекордтық деңгейге – 4%-ға көтерілді. Трамп бұл экономикалық мәселе Иранмен арадағы шиеленіс шешілген соң тұрақталады деген пікірде. Қазіргі уақытта Катар өкілдері екі ел арасында делдалдық миссиясын атқаруда. Осы тұста МАГАТЭ Кеңесі Иранды ядролық қорлары туралы ақпаратты ашып, инспекторларға мүмкіндік беруге шақыратын резолюция қабылдады. Тегеран бұл құжатты саяси қысым деп атап, қабылдамады.