Бұрынғы министр Кіші Аралды сақтап қалудың жолын ұсынды

Су шаруашылығы саласының ардагері, бұрынғы Мелиорация және су шаруашылығы министрі Нариман Қыпшақбаев Көкарал бөгетін екі метрге көтеруді ұсынып отыр. Оның айтуынша, бұл — Солтүстік Арал теңізін сақтап қалудың ең тиімді жолы.

“Кіші Аралға 51 миллиард текше метр су жинау мүмкін емес. Су мол болған күннің өзінде 30 миллиардтан артық жиналмайды. Себебі Сырдария өзенінің жалпы су көлемі — 37 миллиард текше метр. Ал өзен бойындағы төрт мемлекеттің суға деген сұранысы үш есе артты. Қазір олар 100 миллиард текше метр су сұрап отыр. Халық саны өсіп жатыр, зауыттар мен елдімекендер көбейіп жатыр. Сондықтан артық су келеді деген бос сөз”, — деді Нариман Қыпшақбаев.

Сарапшы Сырдария суының тұрақсыз екенін, кей жылдары қатарынан 4–5 жыл бойы судың аз келетінін де атап өтті.

Ол Кіші Арал жобасының бастауында тұрған мамандардың бірі ретінде 1988 жылдан бастап жұмыс істегенін, ал 2006 жылға дейін Арал теңізінде балық мүлде болмағанын еске салды.

“Біз 12 шақырым бөгет салғалы теңіз тұщыланып, балық қайта оралды. Қазір жылына 8–10 мың тоннаға дейін балық ауланады. Арал қаласында 8 балық зауыты салынды. Яғни, бөгет өзінің маңызын дәлелдеді. Енді соны 2 метрге көтеріп, нығайту керек”, — деді Қазақстанның Еңбек сіңірген гидротехнигі.

Айта кетейік, қазіргі таңда Су ресурстары және ирригация министрлігі Солтүстік Аралды сақтау жобасының бірнеше нұсқасын қарастырып жатыр. Бұл жоба Кіші Аралды сақтап қалуға, судың тұздылығын төмендетуге және экологиялық жағдайды жақсартуға бағытталған. Қоғамдық талқылаулар Арал ауданының тұрғындарының қатысуымен өтіп жатыр.