Болоньяда өткен Әлемдік иттер көрмесінде (World Dog Show 2026) қазақ тазысы топ жарып, әлем чемпиондары атанды

Италияның Болонья қаласында өткен ең ірі халықаралық кинологиялық шара – «World Dog Show 2026» дүниежүзілік көрмесінде қазақ тазысы тұңғыш рет кең көлемде таныстырылды. Көрме қорытындысы бойынша елімізден қатысқан барлық ит жоғары дәрежелі «Үздік» деген бағаға ие болды. Соның ішінде екі тазы Әлем чемпионы, ал тағы екі ит Жастар арасындағы әлем чемпионы атағын жеңіп алды.

«World Dog Show 2026» қорытындысы

Халықаралық сарапшылардың шешімімен астаналық Лашын атты тазы тұқымның ең үздік өкілі әрі жарыс жеңімпазы деп танылды. Сондай-ақ, Лашын мен астаналық Рея Әлем чемпионы титулын қанжығасына байлады. Жастар арасындағы әлем чемпионы атағы алматылық Челси мен Табиғатқа берілді.

Сонымен қатар Лашын көрменің үздік төбеті, Рея үздік қаншығы болып танылды. Жастар санатында Челси үздік төбет-юниор, ал Табиғат үздік қаншық-юниор ретінде бағаланды. Жеңістен кейін жарысты ары қарай жалғастырған Челси құмай тазылар арасында 4-орынға тұрақтап, қазақ тазысының әлемдік аренадағы тарихи нәтижесін тіркеді.

5 маусымда өткен «Club Show 2026» аясында Лашын тұқымның үздік өкілі атанса, астаналық Ақтабан үздік төбет-юниор, Табиғат үздік қаншық-юниор, ал Рея үздік қаншық деп танылды.

«ENCI Winner 2026» бәсекесінде астаналық Перс жеңімпаз атанып, өз жас ерекшелігі бойынша құмай тазылар арасындағы жарысты жалғастырып, 4-орынды иеленді.

Көрме бағдарламасының жалпы қорытындысы бойынша Дастер, Лашын, Рея, Перс, Арлан және Кербезге «Италия чемпионы» титулы берілді. Сарбаз чемпиондар класының резервтік жеңімпазы атанды. Челси, Табиғат және Ақтабан «Италияның жас чемпионы» атағын қорғап шықты.

2 маусымда Халықаралық кинологиялық федерацияның (FCI) IV Бүкіләлемдік төрешілер конгресі шеңберінде Қазақстан кинологтар одағы қазақ тазысына арналған арнайы дәріс оқыды. Дүниежүзінен жиналған сарапшы-төрешілерге тұқымның шығу тарихы, оның қазақ мәдениетімен байланысы, экстерьері, қозғалыс ерекшеліктері, мінез-құлқы және рингтегі бағалау ерекшеліктері туралы маңызды ақпарат берілді.

Бұл шара стратегиялық тұрғыдан үлкен маңызға ие. Себебі, тазы тұқымы 2024 жылы ғана FCI тарапынан алдын ала танылған болатын. Сондықтан әлемдік деңгейдегі әрбір таныстырылым тұқымның халықаралық деңгейде түпкілікті мойындалуына тікелей ықпал етеді.

«TOP Dog 2026» халықаралық шоу-бағдарламасына Қазақстанның тұңғыш рет қатысуы көрменің тарихи сәтіне айналды. Көрменің бас экранында Қазақстан Республикасының Мемлекеттік туы көрсетіліп, еліміздің атауы жарияланды. Орталық аренада Қазақстан атынан астаналық Дастер атты тазы, хендлер Карина Камибаева және Қазақстан кинологтар одағының президенті Бауыржан Серікқали бой көрсетті.

Қазақ тазысын әлемдік деңгейде дәріптеу және сақтау жұмыстары Мемлекет басшысының тікелей тапсырмасы аясында жүзеге асырылып жатыр. 2023 жылғы қаңтарда «Қазақы ит тұқымдарын сақтау және өсімінлайықтау туралы» заңға қол қойылған болатын. Осы жұмыстардың нәтижесінде 2024 жылғы қыркүйекте FCI бұл тұқымды алдын ала тіркеп, Қазақстанға шығыу тегі елі мәртебесін бекітті. Тұқымның халықаралық деңгейде түпкілікті танылуы үшін селекциялық және көрмелік мәліметтерді жинақтау процесі жалғаса береді.