"Біздің соғыс емес": АҚШ Украина мен Ресейді татуластырудан бас тартуы мүмкін

АҚШ Президенті Дональд Трамп алдағы күндері Ресей мен Украина арасындағы бейбіт келісімге қол жеткізу мүмкін болмайтын жағдайда бұл бастамадан бас тартуы мүмкін. Бұл туралы АҚШ Мемлекеттік хатшысы Марко Рубио Париждегі келіссөздерден кейін мәлімдеді, деп хабарлады BBC-дің орыс қызметі.

«Біз бұл іспен айлар бойы айналыспаймыз. Сондықтан алдағы бірнеше күн ішінде бұл мәселені нақтылап алуымыз керек. Егер алдағы апталарда бейбіт келісімге қол жеткізуге мүмкіндік болса, біз дайынбыз. Ал егер болмасаса, бізде басқа да маңызды басымдықтар бар», — деді Рубио.

Бұл мәлімдеме 17 сәуір күні Парижде өткен келіссөздерден кейін жасалды. Келіссөздерге АҚШ, Украина және Еуропа елдерінің делегациялары қатысты. Бұған дейін Трамп әкімшілігі Ресей және Украинамен жеке келіссөздер жүргізіп, Еуропаны бұл процестен тыс қалдырған болатын.

Париждегі кездесуге АҚШ-тың Мемлекеттік хатшысы Марко Рубио және Трамптың арнайы өкілі Стивен Уиткофф қатысты. Уиткофф өткен аптада Санкт-Петербургте Владимир Путинмен кездескен. Украина атынан Сыртқы істер және Қорғаныс министрлері, сондай-ақ Президент кеңсесінің басшысы болды. Кездесуге сонымен қатар Франция Президенті Эммануэль Макрон, Ұлыбритания және Германия сыртқы істер министрлері де қатысты.

«Президент бұл мәселені қатты уайымдайды. Ол бұл процеске көп уақыт пен күш жұмсады. Бұл маңызды, бірақ дәл сондай, тіпті одан да маңызды басқа мәселелер бар. Украинадағы соғыс — қайғылы жағдай. Бірақ бұл біздің соғыс емес. Біз оны бастаған жоқпыз. АҚШ үш жылдан астам уақыт бойы Украинаға көмектесіп келеді, біз бұл соғыстың аяқталғанын қалаймыз. Егер тараптардың бірі немесе екеуі де бейбіт жолға шынымен ниетті болса, біз көмектесуге дайынбыз. Егер олай болмаса — біз басқа бағытқа бет аламыз», — деді Рубио өз сөзінде.

Еске салайық, Трамп сайлауалды кампаниясында президенттікке келісімен 24 сағат ішінде Украинадағы соғысты тоқтатуға уәде берген еді. Кейін бұл мерзімді алты айға дейін ұзартатынын айтқан.

Қазіргі таңда Трамп екі тарапты келіссөзге итермелеуге тырысып жатыр. Ол Ресейге қарсы санкцияны күшейту және Украинаға миллиардтаған долларлық әскери көмекті тоқтату арқылы қысым көрсетіп отыр.

Алдағы жағдай қалай өрбитіні әзірге белгісіз. АҚШ қазіргі саясатын өзгеріссіз сақтап қалуы мүмкін немесе Украинаға қолдау көрсетуді доғару туралы шешім қабылдауы ықтимал.

Reuters агенттігіне пікір білдірген үш еуропалық дипломатиялық дереккөздің айтуынша, Рубионың мәлімдемесі — Трамп әкімшілігінің Ресейдің бейбітшілікке келудегі қырсықтығына қатысты өсіп келе жатқан ренішін көрсетеді.

Егер Вашингтон келіссөздерден бас тартса, олардың сәтсіз аяқталу ықтималдығы жоғары, өйткені Мәскеуге де, Киевке де АҚШ секілді қысым көрсете алатын басқа мемлекет жоқ.