Бангкоктағы түнгі клубта болған өрт салдарынан 28 адам қаза тапты

Тайланд астанасындағы танымал ойын-сауық орындарының бірінде болған ірі өрт жексенбі күні кешкі уақытта Chatuchak ауданында орналасқан Rong Beer Na Lat Phrao мейрамхана-барында орын алды. Куәгерлердің айтуынша, өрт сахна маңынан басталып, тез арада бүкіл ғимаратқа таралған. Жалын кесірінен электр қуаты сөніп, бөлме ішін қою түтін басқан, деп хабарлайды BBC.

Ұлттық полиция басшысы Китрат Панпхеттің хабарлауынша, құрбан болғандардың көпшілігі дәретхана бөлмелерінен табылған. Адамдар үрейге бой алдырып, жарық болмағандықтан сол жерге тығылуға тырысқан. Барлығы 71 адам жарақат алды, оның ішінде 25 адамның жағдайы өте ауыр. Алдын ала мәліметтер бойынша, өлімге негізінен түтінмен улану себеп болған.

Бангкок қаласының апаттардың алдын алу департаменті өртке ауа баптағыш жүйесіндегі электр сымдарының қысқа тұйықталуы себеп болуы мүмкін деп мәлімдеді. Қала губернаторы Чатчарт Ситтипунт төбедегі тез жанғыш декорациялар жалынның тез таралуына түрткі болғанын атап өтті. Сондай-ақ төтенше жағдай кезінде эвакуациялық жолдардың жабық болуы немесе бөгелуі ықтимал екендігі тексеріліп жатыр.

Chatuchak аудандық әкімшілігі ғимаратты 30 күнге жабу туралы шешім қабылдады. Билік қаза тапқандардың отбасыларына 29 300 бат, ал ауруханада жатқандарға 4 000 бат көлемінде өтемақы төленетінін жариялады. Тайландта бұған дейін де осындай трагедиялық оқиғалар тіркелген болатын. Қазіргі уақытта оқиға орнында тергеу-жедел тобы жұмыс істеп жатыр.