«Айырмашылығы жер мен көктей»: Туристер неге Оңтүстік Кореяда денсаулық тексертуге құмар

Шетелдік саяхатшылар Оңтүстік Кореяға сапары кезінде демалыспен қатар кешенді медициналық тексерістен (чек-ап) өтуді де жоспарға жиі қосатын болды, деп хабарлайды BBC. Бұл бағыттың танымалдығы тиімді баға, жоғары қызмет көрсету жылдамдығы және шетелдік пациенттерге арналған ағылшын тіліндегі қолдаудың қолжетімділігімен түсіндіріледі.

Оңтүстік Кореяның Денсаулық сақтау және әлеуметтік қамсыздандыру министрлігінің мәліметінше, 2025 жылы елге 2,01 миллион шетелдік пациент келген. Бұл көрсеткіш бұрынғы жылмен салыстырғанда 71,7 пайызға жоғары. Негізгі пациенттер ағыны Қытай, Жапония, Тайвань және АҚШ елдерінен тіркелуде. Сала мамандарының айтуынша, мемлекет тарапынан заңнамалық деңгейде қолдау тауып отырған бұл сала ел экономикасының маңызды экспорттық бағытына айналды.

Сұраныстың артуына басты себеп - медициналық қызметтің қолжетімділігі мен жоғары сапасы. CEOWorld Healthcare Index рейтингі бойынша екінші орында тұрған Кореяның денсаулық сақтау жүйесі мемлекеттік бағаны реттеу саясатының арқасында қолжетімді болып отыр. Мәселен, батыс елдеріндегі бір ғана МРТ диагностикасының құнына Оңтүстік Кореяда толық дене сканерлеуін жасатуға болады. Жол шығындарын қосқанның өзінде, Кореяда емделу немесе тексерістен өту әлдеқайда арзанға түседі.

Сонымен қатар арнайы медициналық консьерж қызметтері шетелдіктерге алдын ала тіркелуге, аудармашы табуға және қажетті тексерістерді бірнеше сағаттың ішінде аяқтауға мүмкіндік береді. Диагностика нәтижелері әдетте 7–14 күн ішінде пациенттің электронды поштасына бірнеше тілде жолданады.

Сарапшылар медициналық туризмді жоспарлайтын саяхатшыларға тексеріс нәтижелерін өз елдеріндегі емдеуші дәрігермен бөлісуді және арнайы медициналық сақтандыруды алдын ала рәсімдеуді ұсынады.