Араб елдері Газа секторын қалпына келтіру жоспарын мақұлдады: Тұрғындар қоныс аудара ма?

Каирде өткен Араб мемлекеттері лигасының саммитінде араб елдерінің басшылары Газа секторын тұрғындарды қоныс аудармай қалпына келтіру жоспарын мақұлдады. Жоспарды Мысыр ұсынған, деп хабарлады BBC-дің орыс қызметі.

Қалпына келтіру жұмыстарына 53 млрд доллар бөлінеді. Араб елдерінің басшылары халықаралық қауымдастық пен қаржы институттарын анклавқа қолдау көрсетуге шақырды.

Жоспар үш кезеңде жүзеге асырылады

Мысырдың Asharq al-Awsat басылымының мәліметінше, жоспар үш кезеңде жүзеге асып, 3-5 жылға созылады. Жөндеу жұмыстары кезінде палестиналықтар үшін "қауіпсіз аймақтар" құрылады.

🔹 Бірінші кезең (2027 жылға дейін)

• Негізгі инфрақұрылымды қалпына келтіру (жолдар, коммуналдық желілер, әлеуметтік нысандар).
• 200 мың тұрақты баспана салу (1,6 млн адамға арналған).
• Жалпы шығын – 20 млрд доллар.

🔹 Екінші кезең (2030 жылға дейін)

• Инфрақұрылым жобаларын аяқтау.
• Қосымша 200 мың тұрғын үй салу.
• Өнеркәсіптік аймақтар, балық аулау порты, теңіз сауда порты және әуежай салу.
• Қаржыландыру көлемі – 30 млрд доллар.

🔹 Үшінші кезең

• Қаржы тұрақтылығын қамтамасыз ету үшін халықаралық бақылаудағы траст қоры құрылады.
• Газа секторын басқару үшін тәуелсіз палестиналық технократтардан құралған әкімшілік комитет құрылады.
• Комитеттің қызмет ету мерзімі – 6 ай, осы уақыт ішінде Палестина автономиясы басқаруды қайта алады.

ХАМАС келісімі мен халықаралық бақылау мәселесі

Reuters агенттігінің хабарлауынша, ХАМАС бұл комитетке мүшелікке үміткер ұсынбайтынын мәлімдеген, бірақ комитеттің міндеттері, құрамы мен күн тәртібі бойынша келісім беруі тиіс.

Мысырдың сыртқы істер министрі Бадр Абдельатти комитет мүшелерінің есімдері қазірдің өзінде белгілі екенін мәлімдеді.

Жоспар АҚШ президенті Дональд Трамптың Газа секторын "Таяу Шығыстағы Ривьераға" айналдыру және 2 миллионнан астам палестиналықты араб елдеріне көшіру туралы жобасына балама ретінде ұсынылды.

Араб елдерінің ұстанымы

Иордания, Сауд Арабиясы, БАӘ және Катар бұл жоспарды қолдайтынын мәлімдеді. Дегенмен:

• Сауд Арабиясы палестиналық қарулы топтарды қарусыздандыруды талап етеді.
• БАӘ де осы ұстанымды қолдайды.
• Қатар бұл талапқа қарсы.
• Мысыр палестиналықтарды қарусыздандыруды "мүмкін емес шара" деп санайды.

Бұл жоспар Газа секторын қайта қалпына келтірудің негізгі жолы ретінде қарастырылып отыр.