Әлеуметтік желілердегі үлкен төңкеріс: Meta сотта жеңілсе, біз қолданатын Instagram қалай өзгереді?

Әлеуметтік желілер тарихындағы ең ірі сот процесі басталуға жақын. АҚШ-тың Калифорния және Нью-Йорк бастаған 30 штаты Meta компаниясына қарсы масштабты талап-арыз беріп, олардан 1 триллион доллар өтемақы мен платформалардың жұмыс алгоритмін түбегейлі өзгертуді талап етуде. Егер компания сотта жеңілсе, Instagram бен Facebook біз білетін қалыптан мүлдем өзгеше сипат алуы мүмкін.

Билік өкілдері Meta-ны жасөспірімдер мен балалардың психикалық денсаулығына зиян келтірді және оларды желіге байлап қою үшін манипуляциялық функцияларды әдейі енгізді деп айыптауда. Талап-арызда Instagram мен Facebook-тегі лайк есептегішін толығымен алып тастау, таусылмайтын лентаны (бесконечная прокрутка) жою, видеолардың автоматты түрде қосылуын бұғаттау және түрін өзгертетін маска-фильтрлерге тыйым салу сұралған. Сонымен қатар жасөспірімдерге бірнеше аккаунт ашуға және жоғалып кететін «Stories» жариялауға шектеу қою ұсынылуда.

Бұл талаптар ойдан шығарылмаған. Жақында Нью-Мексико штатының соты Meta компаниясын «қоғамдық қауіп» деп танып, 942 миллион доллар айыппұл салған болатын. Зерттеулер мен ішкі құжаттар лайктар мен визуалды салыстырулардың жасөспірімдер арасында депрессия, жалғыздық және өзіне көңілі толмаушылық сезімдерін тудыратынын дәлелдеген.

Meta бұл айыптаулармен келіспей, өз тарапынан жасөспірімдерді қорғауға әрқашан басымдық беріп келе жатқанын алға тартуда. Дегенмен, АҚШ халқының үштен екісін өкілдік ететін 30 штаттың бұл қадамы әлеуметтік желілердің даму бағытын мәңгіге өзгертуі сенімді.