АҚШ Жоғарғы соты Трамп әкімшілігіне трансгендерлерді армиядан шеттетуге уақытша рұқсат берді

АҚШ Жоғарғы соты президент Дональд Трамп әкімшілігінің трансгендер адамдарды Қарулы күштер қатарынан шеттету туралы шешіміне уақытша рұқсат берді. Бұл туралы AFP агенттігі хабарлады. Шешім алты консервативті судьяның қолдауымен қабылданды, ал үш судья қарсы дауыс берді.

Ақ үйдің баспасөз хатшысы Кэролайн Левитт бұл шешімді «үкімет үшін үлкен жеңіс» деп атады. Ал трансгендер белсенділер бұл шешімді сынға алып, бірнеше мың әскери қызметшінің тағдырына әсер етуі мүмкін екенін мәлімдеді.

Lambda Legal және Human Rights Campaign Foundation ұйымдары бұл шешімді «трансгендер әскери қызметшілерге жасалған ауыр соққы» деп бағалады.

«Трансгендерлер өздерінің біліктілігі мен Отан қорғауға деген адалдығын дәлелдеді», – делінген олардың бірлескен мәлімдемесінде.

Жоғарғы сот бұл шешімімен наурыз айында федералды судья Анна Рейес шығарған бұйрықты жойды. Рейестің айтуынша, Трамптың жарлығы трансгендер адамдардың құқықтарын шектеп, АҚШ Конституциясындағы заң алдындағы тең қорғану қағидатына қайшы келеді.

Еске салайық, қаңтар айының соңында Дональд Трамп Қарулы күштерде «трансгендер идеологиясына» тыйым салу туралы жарлыққа қол қойған болатын. Құжатта трансиденттілік «әскери тәртіпке және адал қызметке» сәйкес келмейді деп көрсетілген.

Пентагон дерегінше, 2024 жылдың соңында АҚШ армиясында «гендерлік дисфория» диагнозы қойылған 4 240 адам қызмет еткен. Жалпы, елдегі әскери қызметшілер саны 2 миллионнан асса, соның шамамен 15 мыңы – трансгендер адамдар.

Дональд Трамп инаугурацияға дейін-ақ трансгендер саясатына қарсы екенін ашық айтқан. 2024 жылдың желтоқсанында ол «АҚШ үкіметі тек екі жынысты – еркек пен әйелді ғана мойындайды» деп мәлімдеді және Ақ үйге оралған соң бірден осы мазмұндағы жарлыққа қол қойды.