АҚШ Украинамен барлау мәліметтерін алмасуды уақытша тоқтатты

АҚШ Украинамен барлау мәліметтерімен алмасуды уақытша тоқтатты. Бұл туралы Орталық барлау басқармасының (ЦРУ) директоры Джон Рэтклифф мәлімдеді. Reuters агенттігінің хабарлауынша, бұл шешім Вашингтонның Украина президенті Владимир Зеленскийге қысымды күшейту мақсатында қабылданған.

Reuters дереккөзі Трамп әкімшілігінің Украинаға әскери нысандар туралы барлау ақпаратын беруді толық тоқтатқанын хабарлады. Дегенмен басқа ақпарат көздері бұл шектеу ішінара ғана енгізілгенін айтады.

АҚШ бұған дейін Украинаға ресейлік әскерге қарсы күрес жүргізу үшін маңызды барлау мәліметтерін берген, соның ішінде 2022 жылдың ақпанында Киевке басып кіруге кедергі келтірген ақпараттар да болған.

Дүйсенбі күні Вашингтон Киевке әскери көмекті де уақытша тоқтатқанын жариялады. Бұл шешім Ақ үйдегі өткен аптадағы сәтсіз кездесуден кейін қабылданды, онда Дональд Трамп пен Владимир Зеленский арасындағы пікірталас шиеленісіп кеткен.

Осы жағдайға байланысты АҚШ пен Украина арасындағы маңызды келісімнің қол қойылуы кейінге шегерілді. Бұл келісім Украинадағы стратегиялық пайдалы қазбалар кен орындарынан түскен табысты АҚШ-тың әскери көмегіне өтемақы ретінде беру туралы шарттарды қарастырады.

Дегенмен, сейсенбі күні Трамп Зеленскийден бейбіт келіссөздерге дайын екенін білдіретін хат алғанын мәлімдеді.

Екі ел арасындағы келіссөздер жақын арада қайта жалғасады деп күтіледі. Бұл келісім Вашингтон, Киев және Мәскеу арасындағы соғысты тоқтатуға бағытталған ұзақмерзімді келіссөздердің алғашқы қадамы болуы мүмкін.