АҚШ-та Meta компаниясына қарсы рекордтық сот процесі басталды: Айыппұл көлемі 1,4 триллион долларға жетуі мүмкін

АҚШ-тың Калифорния штатындағы Окленд федералды сотында Meta Platforms компаниясына қарсы тарихи сот процесі басталды. Елдің 29 штатынан құралған коалиция Марк Цукербергтің империясын жасөспірімдер мен балалардың жүйке жүйесіне нұқсан келтіріп, оларды әлеуметтік желілерге әдейі тәуелді етті деп айыптауда.

Исттердің пікірінше, Facebook пен Instagram платформалары жас қолданушыларды экран алдында мүмкіндігінше ұзақ ұстау және жарнамадан түсетін пайданы еселеу үшін арнайы психологиялық механизмдермен әзірленген. Сотта талап қоюшылар тарапының адвокаты Меган О’Нил Meta-ның бизнес-моделін «пайдаланушыны арбау, оны барынша ұзақ ұстау, деректерін жинау және шындықты жасыру» деп сипаттап, компанияның жастарды тұзаққа түсіру арқылы орасан зор табыс тауып отырғанын мәлімдеді.

Бұған қоса, гигант компания тұтынушыларды платформалардың қауіпсіздігі туралы жаңылыстырды және балалардың жеке деректерін қорғау заңнамасын бұзды деп айыпталуда. Әрбір бұзушылық үшін 20 мың долларға дейін айыппұл қарастырылған. Meta компаниясының ішкі есептеулеріне сәйкес, сотта жеңілген жағдайда салынатын айыппұлдың жалпы сомасы 1,4 триллион АҚШ долларына жетуі мүмкін. Бұл - компанияның бүкіл нарықтық құнына жуық қаражат.

Meta заңгерлері өз кезегінде бұл айыптауларды жоққа шығарып, штатардың бас прокурорлары ешқандай бұлтартпас дәлел келтіре апағанын және компаниядан «негізсіз орасан сомаларды» өндіріп алуға тырысып жатқанын алға тартты. 5 аптаға созылатын бұл сот процесі бүкіл әлемде әлеуметтік желілердің жасөспірімдерге тигізетін зияны қызу талқыланып жатқан тұста өтуде.