Африкада маймылдың жаңа түрі табылды (ФОТО)

Конго Демократиялық Республикасының шығысындағы тропикалық ормандардан ғалымдар приматтардың бұрын-соңды белгісіз болған су жаңа түрін тіркеді. Ғылыми тілде Colobus congoensis деп аталған бұл ерекше жануарды жергілікті тұрғындар «Ликвели» дейді.

Бұл маймылдың бар екенін ресми түрде дәлелдеу үшін зерттеушілерге 20 жылға жуық уақыт кеткен. Алғашқы фотодеректер 2008 жылы түсірілгенімен, тек 2018–2022 жылдар аралығында жиналған 114 бақылау жазбасы мен айғақтар оның жеке ғылыми түр екенін толық растады. Ашылған жаңалық халықаралық «PLOS One» ғылыми журналында жарияланды.

Флорида Атлант университетінің генетикалық сараптамасы бұл жануардың өзіне ең жақын туыстас маймылдардан шамамен 4–5 миллион жыл бұрын бөлініп шыққанын көрсетті. Маймыл өзінің ерекше келбетімен көзге түседі: оның бетінде ашық түсті дақтар, басында тік өскен үрпек жүні және ең бастысы - боянып алғандай қызғылт-сары еріндері бар. Бұдан бөлек, оның шығаратын дыбысы мен дауыс ырғағы да өзге приматтардан мүлдем бөлек.

Ғалымдардың айтуынша, бұл сирек кездесетін жануар өте шағын аймақты (1 700 шаршы шақырым төңірегін) мекендейді. Сол себепті қазіргі таңда орманның оталуы мен браконьерлік салдарынан бұл түрдің жойылып кету қаупі жоғары. Мамандар жаңадан тапқан жануарды сақтап қалу үшін шұғыл қорғау шараларын қолға алуда.