Жеткіншектің өлімінен кейін Албанияда TikTok-қа тыйым салынды

Албания премьер-министрі Эди Рама TikTok әлеуметтік желісіне бір жылға толық тыйым салынатынын мәлімдеді. Бұл шешім қараша айында 14 жасар оқушының құрдасының қолынан қаза табуына байланысты қабылданды.

Раманың айтуынша, TikTok жасөспірімдер арасындағы агрессияның артуына ықпал етеді. Жергілікті БАҚ мәліметінше, қайғылы оқиғаға дейін оқушылар арасында әлеуметтік желілерде даулар болған. Оқиғадан кейін TikTok-та қылмыскерге қолдау білдірген бейнероликтер жарияланған.

«Мәселе – біздің балаларымызда емес. Мәселе – бізде, біздің қоғамда, TikTok және балаларымызды өз құрсауына алатын басқа платформаларда», – деп мәлімдеді Рама.

TikTok албан үкіметінен бұл шешім бойынша «шұғыл түсініктеме» сұрады. Компания өкілдері жанжалға қатысушылардың TikTok-та аккаунттары болғанын растайтын дәлелдер жоқ екенін және бейнероликтердің басқа платформада жарияланғанын мәлімдеді.

TikTok-қа тыйым келесі жылдың басында күшіне енеді. Сонымен қатар Албания билігі мектептерде қауіпсіздікті күшейту үшін полицейлер санын арттырып, ата-аналармен байланыс орнатып жатыр.

Балалар қауіпсіздігі мәселесі басқа елдерде де алаңдаушылық туғызып отыр. ЕО-ның Франция, Германия және Бельгия сияқты елдері жасөспірімдердің әлеуметтік желілерді қолдануына шектеулер енгізді. Сондай-ақ Аустралияда да осыған ұқсас шаралар қабылданған. Ал алдағы Польша төрағалығы ЕО Кеңесінде балалардың психикалық денсаулығына әлеуметтік желілердің әсеріне ерекше назар аударуды жоспарлап отыр.