Зеленский екінші мерзімге сайлауға түсуге шешім қабылдады – "Телеграф"

Украиналық "Телеграф" басылымының мәліметінше, Украина президенті Владимир Зеленский екінші президенттік мерзімге өз кандидатурасын ұсынуға шешім қабылдады. Алайда бұл туралы мемлекет басшысы әлі ресми мәлімдеме жасаған жоқ.

Басылымның деректеріне сәйкес, Зеленскийге украиналықтардың 52 пайызы сенеді, бұл оған келесі сайлауда жеңіске жету мүмкіндігін береді. Бірақ басты бәсекелесі – Ұлыбританиядағы Украина елшісі, Украинаның Қарулы Күштерінің бұрынғы бас қолбасшысы Валерий Залужный кандидатурасын ұсынса, бұл көрсеткіш өзгеруі мүмкін.

"Телеграф" басылымының жазуынша, Зеленскийдің сайлауалды стратегиясында Залужныйдың есімін түрлі саяси күштер пайдаланып отыр. Олардың қатарында экс-премьер Юлия Тимошенко, экс-президент Петр Порошенко және қазіргі мемлекет басшысы бар. Басылымның дерегінше, президент кеңсесінің басшысы Андрей Ермак Залужныйға Зеленскийді қолдайтын болса, оған "Слуга народа" партиясының тізіміндегі бірінші орын мен Жоғарғы Раданың спикері лауазымын ұсынатынын жеткізген.

Егер Залужный өз кандидатурасын ұсынуды шешсе, оған қарсы 2022 жылы Херсон қаласын Ресей әскеріне "тапсыру ісі" бойынша қылмыстық іс қозғалуы мүмкін, деп жазды "Телеграф".

Залужный "Телеграф" басылымына берген жауабында өз саяси жоспары туралы пікір білдіруден бас тартты.

 "Алдымен біз мемлекеттігімізді сақтаймыз. Кейін саясат жайында сөйлесеміз", – деп қысқа жауап қайырды ол.

Айта кетейік, Зеленский бұған дейін соғыс кезінде сайлау өткізу мүмкін еместігін бірнеше рет мәлімдеген.

"Әлемде ешкім Украинадан соғыс кезінде сайлау өткізуді талап еткен жоқ. Алдымен Украинаға әділ бейбітшілік қажет, содан кейін украиналықтар әділ сайлау өткізеді", – деген еді ол.

"Телеграф" басылымының мәліметінше, елдегі соғыс жағдайы мен сайлау процесін ұйымдастырудың қиындығына қарамастан, Украинада түрлі саяси күштер алдағы сайлау бойынша белсенді консультациялар өткізіп жатыр.