Венгрияда 1,8 млн еуроға 12 балаға ғана арнап балабақша салынған

Венгрияның Казар ауылында 1,8 миллион еуроға тек 12 балаға арналған балабақша салынған. Венгрия Парламентінің тәуелсіз депутатының өтінішінен кейін Еуропалық алаяқтыққа қарсы бюро (OLAF) балабақша құрылысында заң бұзушылықтар бар-жоғын анықтау үшін тергеу бастады. Бұл туралы Euronews хабарлады.

Қыркүйек айында ашылған балабақшаның әр баласына шамамен 150 000 еуро жұмсалған, бұл ауылдағы үлкен бір отбасылық үйдің құнынан да жоғары. Венгрия Парламентінің тәуелсіз депутаты Акош Хадхази ЕО қорларынан бөлінген қаржының бір бөлігі ұрланған деп мәлімдеді.

"Бұл анық ұрлық. Егер біз олардың кімнен ұсыныс сұрағанын қарасақ, құрылыс компаниясы мен басқа тендерге қатысушылар арасында байланыс барын оңай анықтаймыз. Бұл шын мәнінде мемлекеттік сатып алу емес, манипуляцияланған тендер болды", - деді Хадхази.