Үндістан мен Пәкістанды аптап ыстық жайлады: температура 50°C-қа жетті

Оңтүстік Азияда күн ерте ыси бастады. Бұл туралы The Guardian хабарлады. Әдетте, ең ыстық күндер маусымда болады, бірақ биыл сәуірдің өзінде күн 40–50°C-қа дейін жетіп, халыққа қиындық туғызып отыр.

Дели қаласында күн 40°C-тан асты. Бұл қалыпты жағдайдан 5 градусқа жоғары. Ал Пәкістанның Шахид Беназирабад қаласында температура 50°C-қа жеткен.

Мамандардың айтуынша, мұндай жағдай климаттың өзгеруінен болып жатыр. Қазірдің өзінде жұмысшылар мен диқандардан ыстық өтіп, ауыр халге түсіп жатыр.

1,9 миллиард тұрғыны бар Оңтүстік Азия – климаттық өзгерістерге ең осал аймақтардың бірі. Көптеген адам ыстықтан қорғана алмайды. Аймақта денсаулық сақтау жүйесі мен таза суға қол жеткізу қиын.

Мектептерде балаларға жиі су ішу, тұз ерітіндісі бар алғашқы көмек қобдишаларын дайындау сияқты шаралар қолға алынды. Мамандар бұл жағдайлар енді жиі қайталануы мүмкін деп дабыл қағып жатыр.

«Мұндай аптап бұрын сирек болатын. Қазір ол күнделікті нәрсеге айналып барады», – дейді ғалымдар.