Украина мен Ресей Стамбұлда келісімге келе алмады

15 мамырда Стамбулда өтуі тиіс болған Ресей мен Украина арасындағы келіссөздер кейінге шегерілді. Ресейлік делегацияның жетекшісі, президент көмекшісі Владимир Мединскийдің айтуынша, ресейлік тарап украин делегациясын 16 мамырда таңғы 10-да күтетінін мәлімдеді.

Украина келіссөзге қорғаныс министрі Рустем Умеров бастаған делегацияны жіберетінін кешке қарай хабарлады. Умеров бірнеше тілді, соның ішінде орыс және түрік тілдерін меңгерген. Делегация құрамында сондай-ақ сыртқы істер вице-министрі Сергей Кислица, бас барлау басқармасы басшысының орынбасары Вадим Скибицкий және басқа жоғары лауазымды тұлғалар бар.

Ресейлік делегация құрамында Мединскиймен қатар СІМ орынбасары Михаил Галузин, ГРУ басшысы Игорь Костюков, қорғаныс министрінің орынбасары Александр Фомин және өзге салалардан сарапшылар бар. Алайда Украина президенті Зеленский бұл құрамды «бутафорлық» деп атады.

AFP агенттігінің хабарлауынша, жұма күні Түркияның қатысуымен үшжақты кездесу өткізу жоспарланған.
Украин тарабы келіссөзде басты тақырып – 30 күндік атысты тоқтату болатынын растады. Бұл жөнінде Зеленский Түркия президентімен кездесуінен кейінгі баспасөз мәслихатында да айтты.

Ал Ресей тарапы келіссөздердің мақсаты ретінде «қақтығыстың бастапқы себептерін жою» және «тұрақты бейбітшілік орнату жолын табу» деп отыр.

Еске салайық, бұған дейін Ресей президенті Владимир Путин 15 мамырда Стамбулда ешқандай алдын ала шартсыз келіссөздер бастауға ұсыныс білдірген еді. Алайда ол өзі Стамбулға бармай, делегацияны Владимир Мединский бастап барған. Зеленский болса, Путинмен бетпе-бет кездесуге дайын екенін бірнеше рет мәлімдеген еді.