$ 469.83 € 536.83 ₽ 5.97

Украина дрондары Ресейдегі Wildberries қоймаларына соққы жасады (ВИДЕО)

Абдрахманов Мағжан
18 шілде 2026, 17:19
Украина дрондары Ресейдегі Wildberries қоймаларына соққы жасады (ВИДЕО) Сурет авторы: t.me/V_Zelenskiy_official

18 шілдеге қараған түні Ресейдің Тамбов және Мәскеу облыстарындағы Wildberries қоймаларына дрондар шабуылдады. Тамбов облысының Котовск қаласында жеті адам қаза тауып, 25 адам жараланды. Бұл жөнінде өңір басшысы Евгений Первышов мәлімдеді.

Оның айтуынша, қаза тапқандардың барлығы түнгі кезекте жұмыс істеген. Жараланған 25 адамның 23-і ауруханаға жеткізілген. Бір адамның жағдайы өте ауыр, алтауының жағдайы ауыр, тағы 16 адамның жағдайы орташа ауыр деп бағаланған.

Сол түні Мәскеу облысының Электросталь қаласындағы Wildberries қоймасына да дрон құлаған. Мәскеу облысының басшысы Андрей Воробьевтің мәліметінше, бұл оқиғадан 24 адам жараланған.

Wildberries басшысы Татьяна Ким қаза тапқандардың отбасыларына және зардап шеккендерге көмек көрсетілетінін мәлімдеді. Ресей билігі қоймаларға жасалған шабуылға байланысты қылмыстық іс қозғады.

Украина президенті Владимир Зеленский Мәскеу және Тамбов облыстарындағы екі жүк тарату нысанына соққы жасалғанын растады. Оның сөзінше, бұл орындар Ресейдің дрон өндірісі мен навигациялық жабдықтарына қажетті бөлшектерді жеткізу үшін пайдаланылған. Ресей тарапы бұл мәлімдемеге қатысты дәлел келтірген жоқ.

Ресейдің Қорғаныс министрлігі түн ішінде елдің бірнеше өңірі мен Қара теңіз үстінде 379 украин дроны атып түсірілгенін хабарлады.

#Ресей #Wildberries

Соңғы жаңалықтар