Трамп Зеленскийді "диктатор" деп атады

АҚШ президенті Дональд Трамп Украина президенті Владимир Зеленскийді "сайлау өткізуден бас тартты" деп айыптап, оны "диктатор" деп атады.

"Зеленскийге асығу керек, әйтпесе оның елінен түк те  қалмайды", – деп жазды Трамп 19 ақпанда Truth Social әлеуметтік желісінде.

Трамптың айтуынша, Зеленский Украинада "өте төмен рейтингке" ие әрі оның жалғыз "жетістігі" – АҚШ-тың бұрынғы президенті Джо Байденді "манипуляциялауы". Ол Зеленскийді "АҚШ-ты соғысқа 350 миллиард доллар бөлуге көндірді" деп айыптады. Трамптың сөзінше, бұл соғыста жеңіске жету мүмкін емес, тіпті басталмауы тиіс еді. Ол АҚШ Еуропаға қарағанда 200 миллиард долларға артық қаржы жұмсағанымен, қайтарымына ештеңе алмаған деп мәлімдеді.

Оның айтуынша, Зеленский "АҚШ жіберген ақшаның жартысы із-түзсіз жоғалды" деп мойындаған. Сонымен қатар Трамп АҚШ-тың Ресеймен соғысты тоқтату бойынша келіссөздерді сәтті жүргізіп жатқанын, ал Зеленский "қаржылық көмек алуды жалғастырғысы келеді" деп мәлімдеді.

Зеленскийдің айтуынша, Ресейдің Украинаға қарсы соғысы "320 миллиард доллар шығынға әкелді, оның 200 миллиардын АҚШ пен Еуроодақ көтерді". Ол АҚШ қару-жарақ түрінде шамамен 67 млрд доллар және тіке қаржылай көмек ретінде 31,5 млрд доллар берді деп айтты.