$ 458.48 € 534.68 ₽ 5.43

Трамп Украинаға көмектескені үшін сирек кездесетін металдарын сұрап отыр

Редакция
04 ақпан 2025, 02:28
Трамп Украинаға көмектескені үшін сирек кездесетін металдарын сұрап отыр Сурет авторы: Sarah Meyssonnier/Reuters

АҚШ президенті Дональд Трамп 3 ақпанда Украина Вашингтонға сирек кездесетін металдарды жеткізуге уәде берсе, қаржылай көмек көрсету жалғасатынын мәлімдеді.

"Украинада өте құнды сирек металдар бар. Біз олармен келісім жасағымыз келеді, соған сәйкес олар бізден алған көмекті осы металдармен және басқа да ресурстармен өтейді", – деді Трамп Ақ үйде журналистермен кездесу барысында.

Президенттің айтуынша, Украина бұған дайын екенін мәлімдеген. Ол АҚШ-тың Киевке көрсеткен "300 миллиард долларға жуық көмегін" қайтаруды қалайтынын жеткізді.

AFP агенттігі еске салғандай, Украина президенті Владимир Зеленский "жеңіс жоспары" аясында Батыс елдеріне сирек металдарды инвестицияның қайтарымы ретінде ұсынған. Бұл тізімге уран, титан, литий және графит кіреді.

Сондай-ақ 3 ақпанда Kyiv Post газеті АҚШ-тың халықаралық даму агенттігі (USAID) арқылы Украинаға бөлінген қаржылай көмекті уақытша тоқтатылғанын хабарлады. 2024 жылы бұл көмек 4,28 миллиард долларды құрап, Украина бюджетінің 2%-ын қамтыған.

Соңғы жаңалықтар