Трамп Путинмен кездесу өткізуге дайындық жүріп жатқанын айтты

АҚШ-тың жаңадан сайланған президенті Дональд Трамп Ресей президенті Владимир Путинмен кездесу өткізуге дайындық жүргізіліп жатқанын мәлімдеді.

«Ол кездесуді қалайды, біз дайындық жүргізіп жатырмыз», – деді Трамп журналистерге Флоридадағы Мар-а-Лаго резиденциясында республикашыл губернаторлармен кездесу алдында.

Трамптың айтуынша, президент Путин бұл кездесуді қалайтынын бірнеше рет, тіпті жария түрде мәлімдеген.

«Біз бұл соғысты тоқтатуымыз керек», – деп қосты Трамп. 

Ол бұған дейін бұл соғысты тоқтатуға уәде бергенімен, нақты қандай қадамдар жасайтынын айтпаған еді.

Трамп кездесу қашан өтетінін нақтыламады. Ресей президентінің баспасөз хатшысы Дмитрий Песков журналистерге президенттер арасындағы кездесудің нақты жоспары әлі жасалмағанын айтты. Алайда ол Дональд Трамптың диалог орнату ниетін Мәскеудің құптайтынын жеткізді. Кремль өкілі арнайы шарттар қойылмайтынын, тек екі көшбасшының өзара тілегі қажет екенін атап өтті.