Трамп Палестинаны қолдап, наразылыққа шыққан студенттерді елден қумақ

АҚШ президенті Дональд Трамп антисемитизммен күрес туралы жарлыққа қол қойып, про-палестиналық наразылық акцияларына қатысқан шетелдік студенттер мен басқа да азаматтық мәртебесі жоқ тұлғаларды елден шығаратынын мәлімдеді.

Ақ үй жариялаған құжатта Әділет министрлігіне «Американың еврей халқына қарсы лаңкестік қауіптер, өртеу, вандализм және зорлық-зомбылық әрекеттерін» тергеп, жазалау бойынша жедел шара қабылдау тапсырылған. Сондай-ақ федералды ресурстардың барлығы 2023 жылғы 7 қазандағы ХАМАС шабуылынан кейін университеттер мен көшелерде күшейген антисемитизмге қарсы жұмылдырылатыны айтылды.

«Про-джихадтық наразылық акцияларына қатысқан барлық шетел азаматтарына ескерту жасаймыз: 2025 жылдан бастап сіздерді табамыз және депортациялаймыз», – делінген Трамптың мәлімдемесінде.

Ол сондай-ақ "радикализмге әбден уланған" университеттердегі ХАМАС-ты жақтайтын студенттердің визаларын дереу жоюға уәде берді.

Азаматтық құқықтарды қорғаушы ұйымдар мен заңгерлер бұл шараның сөз бостандығына қайшы келетінін алға тартып, оны сотта даулайтынын мәлімдеді.

АҚШ-тағы ең ірі мұсылман құқық қорғау ұйымы – Америкалық-Ислам қатынастары жөніндегі кеңес (CAIR) де бұл бастамаға қарсылық білдіріп, егер Трамп жарлықты іске асыруға кіріссе, сотқа жүгінетінін жеткізді.

Айта кетейік, 2023 жылы 7 қазанда ХАМАС Израиль аумағына шабуыл жасағаннан кейін Палестинадағы Газа секторына әуе соққылары жасалып, АҚШ университеттерінде бірнеше ай бойы про-палестиналық шерулер өткен болатын. Осыдан кейін елде еврейлерге, мұсылмандарға және Таяу Шығыстан шыққан азаматтарға қарсы қылмыстар көбейген.