Трамп өлім жазасын қайтарды

АҚШ Президенті Дональд Трамп 20 қаңтар күні федералды деңгейде өлім жазасын қайтаруды көздейтін жарлыққа қол қойды. Бұл туралы Ақ үйдің ресми сайтында хабарланған.

«АҚШ-тың ресми саясаты – өлім жазасына рұқсат ететін заңдарды мүлтіксіз орындау және үкімді жүзеге асыруға кедергі келтіретін саясаткерлер мен судьялардың әрекетіне қарсы тұру», – деп көрсетілген Жарлықта.

Трамптың шешіміне сәйкес, АҚШ-тың Бас прокуроры аса ауыр қылмыстарда, соның ішінде құқық қорғау органының қызметкерін өлтіру фактілері бойынша, өлім жазасын сұрауға міндетті болады. Сонымен қатар Бас прокурор әр штатқа өлім инъекциясын жасауға қажетті препараттардың жеткілікті қорын қамтамасыз ету үшін барлық заңды шараларды қолға алуы тиіс.

Президент Трамптың жарлығында Бас прокурордан бұрынғы президент Джо Байден жеңілдеткен 37 сотталушының жағдайын қайта бағалау талап етілген. Олар бұған дейін өлім жазасына кесіліп, кейіннен жазасы мерзімінен бұрын шартты бостандыққа шықпайтын өмір бойғы қамауға ауыстырылған еді.

Байденнің шешімі және Трамптың сыны

Еске сала кетсек, 23 желтоқсан күні сол кездегі АҚШ Президенті Джо Байден 37 сотталушының өлім жазасын жұмсартқан болатын. Ақ үй өкілдерінің айтуынша, олардың үкімі өмір бойы бас бостандығынан айыру жазасына ауыстырылған.

Reuters агенттігі Трамптың Байденнің бұл қадамын «жиіркенішті» деп қатаң сынағанын мәлімдеді. Бұрынғы президенттің айтуынша, «бұл – қылмыс құрбандары мен олардың жақындарына жасалған қорлық».