Трамп импорттық көліктерге 25% салық енгізбекші

АҚШ президенті Дональд Трамп келесі аптадан бастап шетелдік автокөліктер мен жеңіл жүк көліктерінің импортына 25 пайыздық баж салығын енгізетінін мәлімдеді, деп хабарлады Reuters агенттігі.

Трамптың айтуынша, бұл шара АҚШ-та өндірілмеген барлық автомобильдерге қатысты болады. Жаңа баж салығы 3 сәуірден бастап күшіне енеді.

Президент бұл шешімін салық жеңілдіктерінен түсетін шығындарды өтеу әрі АҚШ-тың өндірістік саласын қайта жандандыру үшін жасалып жатқанын атап өтті.

Сарапшылардың айтуынша, жаңа баж салығы автомобиль бағасының күрт қымбаттауына әкеледі. АҚШ Қаржы министрлігінің бұрынғы қызметкері, халықаралық қатынастар жөніндегі кеңестің сарапшысы Брэд Сетсердің пікірінше, бұл өзгерістен кейін Канада мен Мексикадан әкелінетін шамамен 4 млн көлікке жоғары салық салынбақ. Ол АҚШ-та көлік бағасы өсіп, сатылым азаятынын, тіпті мұның ел экономикасына айтарлықтай зиян тигізетінін айтты. Себебі автокөлік импорты АҚШ ЖІӨ-нің шамамен 1%-ын құрайды. Бұған қоса, сарапшы жаңа тарифтер АҚШ, Мексика және Канада арасындағы еркін сауда келісіміне (USMCA) қайшы деп санайды.

Айта кету керек, 2024 жылы АҚШ 474 млрд долларға автокөлік өнімдерін импорттаған. Оның ішінде жеңіл көліктер импорты – 220 млрд доллар. АҚШ-қа автокөлік жеткізуші негізгі елдер қатарында Мексика, Жапония, Оңтүстік Корея, Канада және Германия бар.

Бұған дейін Трамптың бірінші президенттік мерзімінде (2019 жылы) автомобиль импорты ұлттық қауіпсіздікке қауіп төндіреді деп танылғанымен, баж салығы енгізілмеген еді.

Америкалық Автокөлік зерттеу орталығының мәліметінше, жаңа тариф тұтынушылар үшін көлік бағасын бірнеше мың долларға арттырады және сатылымның азаюына, жұмыс орындарының қысқаруына әкеледі. Себебі АҚШ автоөнеркәсібі импортталатын бөлшектерге айтарлықтай тәуелді.