Трамп БРИКС-ке мүше елдерді қорқытты

АҚШ-тың сайланған президенті Дональд Трамп БРИКС елдері халықаралық саудада доллардан бас тартуға тырысса, олардың тауарларына 100 пайыздық баж салығын енгізетінін мәлімдеді. Бұл туралы ол 30 қараша күні өз әлеуметтік желілерінде жазды.

"БРИКС елдерінің доллардан бас тартуға тырысып жатқанына жай қарап отыратын уақыт артта қалды. Біз бұл елдерден БРИКС-тің жаңа валютасын құрмауға және АҚШ-тың ұлы долларын алмастыра алатын басқа валютаны қолдамауға міндеттеме талап етеміз", – деп атап өтті Трамп.

Ол бұл талапты елемейтін елдер 100 пайыздық баж салығына тап болатынын айтты. "БРИКС-тің халықаралық саудада АҚШ долларын алмастыра алуы мүмкін емес, ал мұны іске асыруға тырысқан елдер Америкамен қоштасуға дайын болуы керек", – деп жазды Трамп.

Трамптың бұл мәлімдемесі БРИКС шеңберінде жаңа сауда валютасын құру туралы талқылаулар аясында айтылды. 2023 жылдың сәуірінде Бразилия президенті Луис Инасиу Лула да Силва БРИКС елдері арасында еуроға ұқсас сауда валютасын құруды ұсынған болатын.