Трамп АҚШ-ты тағы да БҰҰ-ның Адам құқықтары жөніндегі кеңесінен шығарды

АҚШ ресми түрде БҰҰ-ның Адам құқықтары жөніндегі кеңесінен шықты. Бұл – елдің аталған ұйымнан екінші рет бас тартуы. Алғаш рет Вашингтон 2018 жылы Дональд Трамптың алғашқы президенттік мерзімінде Кеңестен шыққан болатын.

Ақ үйдің бұйрығында БҰҰ «жаһандық қақтығыстардың алдын алуы тиіс болғанымен, өзінің негізгі миссиясынан алшақтағаны» жазылған.

«... және, керісінше, Америка Құрама Штаттарының мүдделеріне қарсы әрекет етіп, біздің одақтастарымызға шабуыл жасап, антисемитизмді насихаттауда», – делінген құжатта.

Сонымен қатар Трамп БҰҰ-ның Адам құқықтары жөніндегі кеңесін «адам құқықтарын бұзушыларды қорғады», ал ЮНЕСКО-ны «соңғы 10 жыл бойы Израильге қарсы көзқарасты ұстанды» деп айыптады. Сондай-ақ ол БҰҰ-ның Палестиналық босқындарға көмек агенттігін (UNRWA) ХАМАС-тың 2023 жылғы 7 қазандағы Израильге жасаған шабуылын қолдады деп мәлімдеді.

Айта кетейік, АҚШ бұған дейін 2018 жылы да осы кеңестен шыққан болатын, бірақ 2021 жылы Джо Байден әкімшілігі елді ұйым құрамына қайтарды.