Трамп: АҚШ Газа секторын бақылауға алмақ

АҚШ президенті Дональд Трамп Израиль премьер-министрі Биньямин Нетаньяхумен өткен бірлескен баспасөз мәслихатында Вашингтон Газа секторын «бақылауына» алатынын мәлімдеді, деп хабарлады CNN.

«Біз оны басқарамыз және аймақтағы қауіпті жарылмаған бомбалар мен басқа да қаруларды жоямыз. Бұл жерді тегістеп, қираған ғимараттардан толықтай тазартып, қайта дамытамыз», – деді Трамп.

АҚШ президенті Газа секторындағы қауіпсіздік вакуумын толтыру үшін америкалық әскер жіберу мүмкіндігін жоққа шығармады.

«Егер қажет болса, біз мұны жасаймыз. Біз осы аймақты басып алып, дамытамыз», – деп атап өтті ол.

Трамптың пікірінше, бұл қадам Таяу Шығыстың кем дегенде бір бөлігінде тұрақтылық орнатады.

«Барлығымен ақылдаса келе, АҚШ бұл жерді дамытып, мыңдаған жаңа жұмыс орындарын ашады. Бұл – керемет мүмкіндік», – деп мәлімдеді ол.

АҚШ президенті сонымен қатар Газа тұрғындарына басқа елдерге, әсіресе, Египет пен Иорданияға көшуге кеңес берді. Оның айтуынша, «Газа – үлкен қирандылар мекені», сондықтан «адамдар бұл жерге қайта оралмауы керек».

«Олар не үшін қайта оралуы керек? Бұл жер – нағыз тозақ. Мен адамдардың Газға қайта оралуы керек деп ойламаймын. Газа олар үшін өте сәтсіз мекен болды деп санаймын», – деді Трамп.

Алайда көршілес елдер, соның ішінде Египет пен Иордания жаңа палестиналық босқындарды қабылдағысы келмейді.