Тоқаев Абу Дабидегі саммитте не айтты?

Қазақстан Президенті Қасым-Жомарт Тоқаев Біріккен Араб Әмірліктерінде өткен «Абу Дабидің орнықты даму апталығы» саммитіне қатысып, бірінші болып сөз сөйледі. Президент әлемнің климаттың өзгеруі, қуаңшылық, биоалуантүрліліктің жойылуы, су тапшылығы және азық-түлік қауіпсіздігі сияқты жаһандық сын-қатерлермен бетпе-бет келіп отырғанын атап өтті.

Қасым-Жомарт Тоқаев Қазақстанның бұл мәселелерді шешу үшін цифрландыру мен жасанды интеллект, ірі инфрақұрылымдық жобалар және ядролық энергетика салаларына негізделген стратегия әзірлегенін айтты. Сонымен қатар, елімізде жалпы қуаты 43 ГВт болатын жасыл энергетика жобалары жүзеге асырылып жатқанын және алғашқы атом электр станциясының құрылысы энергетика саласының орнықты дамуына ықпал ететінін жеткізді.

Президент орнықты дамудың маңызды алғышарты ретінде көлік инфрақұрылымына ерекше тоқталды. Қазақстан Транскаспий халықаралық көлік бағыты, Солтүстік – Оңтүстік дәлізі және «Бір белдеу, бір жол» бастамасы аясында өз мүмкіндіктерін дамытуға ниетті екенін мәлімдеді.

Сөз соңында Мемлекет басшысы азық-түлік қауіпсіздігі мәселесін ерекше атап, тұрақты ауыл шаруашылығы әдістері мен технологияларын жетілдірудің маңыздылығын атап өтті. Тоқаевтың пікірінше, әлем жаңа даму парадигмасын қажет етеді, ол орнықтылық, әділдік және тұрақтылық қағидаттарына негізделуі тиіс.