Соғыссыз, қансыз: Өзбекстан Қырғызстанға екі ауылды берді

Қырғызстан мен Өзбекстан мемлекеттік шекараны межелеу аясында шекара маңындағы жер телімдерін өзара алмастырды. Нәтижесінде бұрын Өзбекстан аумағына қараған Шоңқара және Таш-Төбе ауылдары Қырғызстан құрамына өтті. Бұл туралы Қырғызстан президентінің баспасөз хатшысы Асқат Алагөзов мәлімдеді.

Аталған екі ауылда шамамен 2,5 мың адам тұрады. Олардың басым бөлігі – этникалық қырғыздар. Қырғыз билігінің мәліметінше, ауыл тұрғындарына Қырғызстан азаматтығы беріледі. Өз кезегінде Қырғызстан Өзбекстанға шекара маңындағы аумағы тең жер телімдерін тапсырған.

Сонымен қатар Сай және Таян ауылдарының арасындағы автомобиль жолын салу үшін жалпы аумағы 236 гектар болатын жерлер алмастырылған. Соның нәтижесінде Баткен облысының тұрғындары Айдаркеннен Баткенге дейінгі жолды қазіргі 225 шақырымның орнына шамамен 55 шақырыммен жүріп өте алады.

Асқат Алагөзов Қырғызстанның Қазақстанға да Тоқмақ маңындағы жол учаскелерін тең көлемде алмастыруды ұсынғанын хабарлады. Жоба жүзеге асса, Алматы көшесінен Кемин қаласына дейін ұзындығы шамамен 150 шақырым болатын ақылы автомагистраль салу жоспарланып отыр.

Еске салсақ, Қырғызстан мен Өзбекстан 2023 жылдың басында мемлекеттік шекараны делимитациялау үдерісін ресми түрде аяқтаған болатын. Соған сәйкес ұзындығы 302,29 шақырым болатын шекара сызығы толық келісілген.